“Krokus” teraktidan maqsad MDHdagi munosabatlarni buzish bo‘lgan – Bortnikov

“Krokus Siti Holl”dagi terakt buyurtmachilari Mustaqil Davlatlar Hamdo‘stligi davlatlari o‘rtasidagi munosabatlarga putur yetkazmoqchi bo‘lgan. Bu haqda Rossiya Federal xavfsizlik xizmati direktori Aleksandr Bortnikov Bishkekda o‘tayotgan MDHga a’zo davlatlar xavfsizlik idoralari va maxsus xizmatlari rahbarlari kengashining yig‘ilishida so‘z ochdi. 

“Ishonchimiz komilki, ushbu teraktga buyruq berganlarning maqsadlaridan biri diniy va milliy omillardan foydalangan holda Hamdo‘stlik mamlakatlari munosabatlariga putur yetkazishdir”, deydi u. 

Federal xavfsizlik xizmati direktorining ta’kidlashicha, Qozog‘iston, Qirg‘iziston, Tojikiston va O‘zbekistondagi hamkasblarining bevosita ko‘magida “Viloyati Xuroson” guruhi a’zolari tomonidan terrorchilarga tayyorgarlik ko‘rish, ularni moliyalashtirish, ularga hujum qilish va olib chiqib ketish internet tarmog‘i orqali muvofiqlashtirilgani aniqlangan.

“Bizning geosiyosiy raqiblarimiz xalqlarimizning uzoq muddatli yonma-yon yashashi davomida shakllangan yagona millatlararo va dinlararo muvozanatni buzishni kutishmoqda”, deydi FXX direktori Bortnikov.

Uning so‘zlariga ko‘ra, Ukraina harbiy razvedkasi bevosita bog‘liq bo‘lgan terrorchilik hujumida musulmonlardan foydalanish maqsad qilingan. 

Bortnikov Hamdo‘stlik mamlakatlari razvedka xizmatlaridagi hamkasblariga tergovda ko‘rsatgan yordami uchun minnatdorlik bildirdi.

Ma’lumot uchun, “Krokus Siti Holl”dagi terakt joriy yilning 22 mart kuni sodir bo‘lgan – qurolli shaxslar konsert zaliga bostirib kirib, odamlarga qarata o‘q uzishni boshlagan. Ular binoga o‘t qo‘yib, qochib ketgan. Terakt oqibatida 145 kishi halok bo‘ldi, 550 dan ortiq kishi jarohatlandi. Hujum uchun javobgarlikni ISHIDning "Viloyati Xuroson" guruhi o‘z zimmasiga oldi.