Kosovoda 454 yillik masjid yoqib yuborildi
Olam
−
20 aprel 2020 9986
Joriy yilning 17 aprel kuni noma’lum shaxslar Verbots qishlog‘idagi Drenas meriyasining eng qadimgi masjidiga o‘t qo‘yishdi. Bu haqda Kosovo Islom jamiyati ma’lum qildi.
Ta’kidlanishicha, 19 aprel kuni mamlakat Islom jamiyati rahbari muftiy Naim Ternava voqea joyiga tashrif buyurdi. Ternava ushbu masjid 1566 yilda qurilganini ma’lum qilgan. Shuningdek, jamiyat rahbari bu masjid Kosovo uchun tarixiy ahamiyatga ega ekanligini aytib, jinoyatchilarni qonun oldida jazolash kerakligini ta’kidladi.
Verbots hokimi Driton Kastrati so‘zlariga ko‘ra, yong‘in 17 aprel, juma namozidan keyin sodir bo‘lgan. Uning aytishicha, yong‘in eski masjid yonidagi yangi masjidga deyarli ta’sir qilmagan, faqat bir nechta oynalari singani.
Ma’lumot uchun, Kosovo aholisining 95,6 foizi musulmonlar hisoblanadi. Hozirda mamlakatda Ramazon oyiga tayyorgarlik ketmoqda.
Siyosiy tomondan Kosovoni davlat sifatida hali ko‘p mamlakat hukumatlari tan olmagan. U 2018 yil 17 fevral kuni Serbiyadan mustaqilligini e’lon qilgan. Mamlakatni mustaqil davlat sifatida tan olishga kelganda dunyo uchga bo‘lingan. AQSH, Kanada, va Yevropaning Ispaniyadan tashqari barcha davlatlari Kosovoni mustaqilligini tan olgan. Rossiya va unga qo‘shni mamlakatlar, Janubiy Amerika davlatlari, Xitoy, Eron, va Hindiston singari Osiyoning bir qator davlatlari bu borada Serbiyani qo‘llab quvvatlamoqda.
O‘zbekiston, Mo‘g‘uliston, Paragvay va Afrikaning bir qancha davlatlari esa betaraf bo‘lib turibdi. Ular BMTning maxsus qarorini kutmoqda.
