Koronavirus Putinning rejalariga to‘siq bo‘lyapti
Olam
−
23 mart 2020 10557
Koronavirusning Rossiya Federatsiyasida tarqalishi fonida mamlakat Konstitutsiyasiga o‘zgartish kiritish masalasi kun tartibidan olinmoqda. Ushbu masala yuzasidan ovoz berish 22 aprel kuni o‘tkazilishi rejalashtirilgandi, ammo uni keyinga qoldirish yuzasidan siyosiy qaror qabul qilingan, deb xabar bermoqda mahalliy “Vedomosti” nashri.
“Asosiy hujjatga o‘zgartish kiritish bo‘yicha umumrossiya ovoz berish sanasi yangi muddatga ko‘chirilgan, ammo u hali belgilanmadi. Shu tufayli, kechiktirish ham rasman e’lon qilinmadi”, deya ma’lumot bergan nashr.
Kremlga yaqin manbaning nashrga ma’lum qilishicha, ovoz berishning kechikishiga koronavirus bilan bog‘liq vaziyat sabab bo‘lgan. Ulardan biri aprelda pandemiya bo‘yicha vaziyat o‘z cho‘qqisiga chiqishini ta’kidlagan, shu paytda ovoz berishni tashkil etish maqsadga nomuvofiq bo‘lishini aytgan.
Boshqa manbaga ko‘ra, umumrossiya ovoz berishi iyunda bo‘lib o‘tadigan Yagona davlat imtihonlariga ham bog‘liq. O‘quvchilar maktab imtihonlarini topshirishi bilan o‘quv muassasalari binolarida ovoz berish uchastkalari tashkil qilinadi.
Manbalardan biri Prezidentning yangi sana belgilash to‘g‘risidagi qarori 25 mart kunigacha e’lon qilinishi mumkinligini aytgan.
Avvalroq, rasmiy Kreml bosh qomusga o‘zgartish kiritish yuzasidan ovoz berishni 22 aprelda o‘tkazishga qaror qilgandi. Vladimir Putin 17 mart kuni ushbu mazmundagi hujjatni imzolagan.
Ma’lumot uchun, bugungi kunda Rossiyada koronavirusga chalingan bemorlar 438 nafarni tashkil qilyapti. Ularning 1 nafari vafot etgan, 17 nafari davolangan.
