KXSHT o‘z mashg‘ulotlarini Markaziy Osiyoga yo‘naltirmoqchi

Kollektiv Xavfsizlik Shartnomasi Tashkiloti (KXSHT) 2024 yilda Markaziy Osiyo mintaqasiga qaratilgan mashg‘ulotlar o‘tkazish niyatida, tayyorgarlik tadbirlari Qirg‘iziston, Qozog‘iston va Tojikistonda bo‘lib o‘tadi. Bu haqda bugun, 16 noyabr kuni brifingda KXSHT Birlashgan shtab boshlig‘i, general-polkovnik Anatoliy Sidorov ma’lum qildi.

“2024 yilga mo‘ljallangan mashq rejasida asosiy e’tibor Markaziy Osiyo kollektiv xavfsizlik mintaqasiga qaratilgan. Xususan, Qirg‘izistonda biz KXSHTga a’zo davlatlar Tezkor harakat kollektiv kuchlari bilan,  Qozog‘istonda  tinchlikparvar kuchlar bilan, Tojikistonda Markaziy Osiyo Tezkor Kollektiv kuchlari bilan mashg‘ulotlar o‘tkazishni rejalashtirmoqdamiz”, degan Sidorov.

Shuningdek, u KXSHT Afg‘onistondan kelayotgan  tahdidni to‘xtatish choralarini ko‘rayotganini ma’lum qilgan.

“Bugungi kunda Afg‘oniston hududidan kelib chiqadigan harbiy xavf yoki tahdid muammosi bo‘yicha bunday to‘qnashuvlar yo‘q. Ammo, shu bilan birga, biz Afg‘onistonning amaldagi rahbariyati davlat hududidagi, jumladan, KXSHTga a’zo davlatlar bilan chegaradosh shimoliy hududlardagi vaziyatni hali to‘liq hal qilmayotganini tushunamiz.  Shu bois muayyan choralar ko‘rilmoqda”, degan Sidorov.

Shu bilan birga, Sidorov Afg‘onistondan kelayotgan narkotik moddalar savdosi bilan bog‘liq muammo hamon saqlanib qolayotganini ta’kidlagan. 

"Albatta, u yerda muammolar bor. Shu bilan birga, bu muammolarni hal qilish yo‘llari ham bor, menimcha, bu mavzu kun tartibidan olib tashlanadi", deya qo‘shimcha qilgan Birlashgan shtab boshlig‘i.

KXSHT vakili Armaniston masalasida ham gap ochgan. Uning aniqlik kiritishicha, Armaniston tashkilotdan chiqish masalasida KXSHTga rasman murojaat qilmagan. 

“Tashkilotning o‘zida KXSHT Kavkaz mintaqasiga qiziqishini yo‘qotgani yoki u yerda Armanistonni tark etishni rejalashtirayotgani haqida hech qanday gap bo‘lmagan. Hatto shunga yaqin qarashlar ham hech kimning xayoliga kelmagan”, deya ta’kidladi Sidorov. 

KXSHT Birlashgan shtab boshlig‘i Armanistonning KXSHTning qo‘shma faoliyatidagi cheklangan ishtiroki Yerevandagi vaziyat bilan bog‘liqligini ta’kidlagan. Shu bilan birga, u arman tomoni tashkilot doirasida qonun chiqarish, hujjatlarni ko‘rib chiqish va moliyalashtirishda ishtirok etishini aytgan.

Eslatib o‘tamiz, oldinroq Armaniston Bosh vaziri Nikol Pashinyan Belarus fuqarosi Aleksandr Lukashenkoga telefon orqali 23 noyabr kuni Minskda bo‘lib o‘tadigan KXSHT yig‘ilishida qatnashmasligini ma’lum qilgandi. Bundan xabar topgan Kreml Pashinyanning bu qaroridan afsusda ekanini bildirgan. Nikol Pashinyan esa KXSHT  respublikadagi o‘z mas’uliyat zonasini belgilashdan bosh tortayotganini aytgandi.