KXDRda Kim Chen Ir sharafiga tangalar muomalaga chiqarildi 

Shimoliy Koreya hukumati respublikaning sobiq yetakchisi Kim Chen Ir tavalludining 80 yilligi sharafiga oltin va kumush kolleksiya tangalarini muomalaga chiqardi. Bu haqda “Yonhap” agentligi xabar berdi.  

Tangalarning old tomoniga Kim Chen Irning surati tushirilgan. Orqa tomonda Pektusan tog‘idagi yaponlarga qarshi partizanlarning yashirin lageri uyi tasvirlangan. Shimoliy Koreyaning rasmiy tarixshunosligiga ko‘ra, unda Kim Chen Ir 1942 yilda tug‘ilgan. 

KXDRda Kim Chen Ir tavalludiga bag‘ishlangan bayram tadbirlari o‘tkazilmoqda. Masalan, kecha, 14 fevral kuni Pxenyanda sobiq rahbar erishgan yutuqlarga bag‘ishlangan bal va anjuman o‘tkazilgan. 

Ma’lumotlarga ko‘ra, KXDR 16 fevral kuni Kim Chen Ir tavalludining 80 yilligi va 15 aprel kuni KXDRning “abadiy Prezidenti” Kim Ir Sen tavalludining 110 yilligi sharafiga harbiy parad o‘tkazishga tayyorgarlik ko‘rmoqda. Agar parad o‘tkazilsa, Shimoliy Koreya qit’alararo ballistik raketalarning yangi modelini namoyish qilishi mumkin.