Kim Putinni eng yaqin do‘stim deb atadi

Shimoliy Koreya yetakchisi Kim Chen In Rossiya Prezidenti Vladimir Putinni Yangi yil bilan tabriklab, uni “eng yaqin do‘stim” deb atadi. Bu haqda Shimoliy Koreyaning KCNA axborot agentligi xabar berdi.

“O‘rtoq Kim Chen In o‘zining eng yaqin do‘sti va safdoshi Putinni Yangi yil bilan samimiy tabriklab, o‘z nomidan, Koreya xalqi va Qurolli kuchlarining barcha askar va ofitserlari nomidan qardosh rus xalqiga, jasur rus armiyasining barcha harbiy xizmatchilariga samimiy tabriklar yo‘lladi”, deyiladi xabarda.

KCNA ma’lumotlariga ko‘ra, Kim 2024 yilning strategik hamkorlik munosabatlari, yangi darajadagi do‘stona munosabatlar sifatida an’anaviy Koreya-Rossiya do‘stona munosabatlarini rivojlantirishga olib kelgan muhim yo‘l bo‘lganini eslatdi. U Putinga 2025 yil “XXI asrda Rossiya armiyasi va xalqi neonatsistlarni yengib, urushda g‘alaba qozonadigan g‘alaba yili bo‘lishini” tilagan.

Kreml saytida Kim Chen In Putinni Yangi yil bilan tabriklagan davlat va hukumat rahbarlaridan biri sifatida qayd etilgan. Ushbu tabrikning aniq matni yo‘q. Kremldan tabrik telegrammalarini olganlar orasida Germaniyaning sobiq kansleri Gerxard Shryoder ham bor.

Iyun oyida Putin Shimoliy Koreyaga tashrif buyurdi va Kim Chen In bilan keng qamrovli strategik hamkorlik shartnomasini imzoladi. Ushbu hujjat haqiqatda mamlakatlar o‘rtasidagi harbiy ittifoqni mustahkamlaydi. Bitimning 4-moddasiga ko‘ra, tomonlardan biriga hujum qilingan taqdirda ikkinchisi barcha mavjud vositalar bilan harbiy yordam ko‘rsatish majburiyatini oladi.

Oktyabr oyida Ukraina Prezidenti Vladimir Zelenskiy KXDR o‘z askarlarini Rossiyaga yordam berish uchun yuborganini aytdi. Keyinchalik bu ma’lumotni Janubiy Koreya razvedkasi va Pentagon ham tasdiqladi. Kiyev ma’lumotlariga ko‘ra, Shimoliy Koreya Rossiyaga 12 minggacha askarini o‘tkazishi mumkin. Noyabr oyida AQSH Davlat departamenti ularning aksariyati allaqachon Kursk viloyatidagi jangovar harakatlarda qatnashayotganini aytgan edi. Seulga ko‘ra, Moskva har bir harbiy xizmatchi uchun Pxenyannga 2 ming dollar to‘laydi, bu KXDR oddiy fuqarosining yillik maoshiga teng.

Eslatib o‘tamiz, avvalroq Ukraina Prezidenti Vladimir Zelenskiy Rossiya askarlari o‘lgan shimoliy koreyaliklarning yuzlarini yoqib yuborayotganini aytgan edi. U koreyaliklarning Rossiya rahbari Vladimir Putin uchun jang qilishi va o‘lishiga hech qanday sabab yo‘qligini ta’kidlab, o‘limdan keyin ham ular hech narsaga erishmasligini eslatdi. Zelenskiy halok bo‘lgan KXDR askarlarining yoqib yuborilishini “Rossiyada hukm surayotgan hurmatsizlik, insoniylikka, hamma narsaga hurmatsizlik namoyishi” deb atagandi. Janglardan birida Ukraina Maxsus operatsiya qo‘shinlari Rossiya tomonida jang qilgan birinchi Shimoliy Koreya askarini qo‘lga oldi. Ammo Zelenskiy Moskva tomonida Rossiyaning Ukrainaga qarshi urushida qatnashgan va Ukraina Maxsus operatsiya qo‘shinlari tomonidan asirga olingan Shimoliy Koreya askarlarining barchasi olgan jarohatlari tufayli vafot etganini ma’lum qildi.