Xorazmda bozorga o‘t ketdi (video)

Bugun, 7 noyabr kuni Xorazm viloyatining Urganch tumanida joylashgan bozorlardan birida yong‘in sodir bo‘ldi. Bu haqda Favqulodda vaziyatlar vazirligi ma’lumot berdi.

Qayd etilishicha, Urganch tumanining “Shermatlar” MFY Gurlan ko‘chasida joylashgan kiyim-kechak savdo do‘konlarida yong‘in yuzaga kelgani to‘g‘risida FVBga xabar kelib tushgan. Shunga ko‘ra 8 ta yong‘in-qutqaruv ekipaji soat 12:59 da hodisa joyiga yetib borib, yong‘in soat 13:20 da o‘rab olingan va soat 13:50 da o‘chirilgan.

Ijtimoiy tarmoqlarda tarqalgan videolardan birida Damas avtomashinasi yonib ketganini ko‘rish mumkin.

FVV xabariga ko‘ra, hodisa oqibatida tan jarohati olgan va vafot etganlar yo‘q. Hozirda yong‘in sababi va keltirilgan moddiy zarar miqdori aniqlanmoqda.

Eslatib o‘tamiz, avvalroq Samarqand viloyatining Samarqand tumanida savdo do‘konlaridan birida katta yong‘in sodir bo‘lgandi. Yong‘in oqibatida savdo do‘konining shift, tom qismi va kiyim-kechak mahsulotlari yonib zararlangandi.