Хоразмда бозорга ўт кетди (видео)
3-саҳифа
−
07 Ноябрь 7121
Бугун, 7 ноябрь куни Хоразм вилоятининг Урганч туманида жойлашган бозорлардан бирида ёнғин содир бўлди. Бу ҳақда Фавқулодда вазиятлар вазирлиги маълумот берди.
Қайд этилишича, Урганч туманининг “Шерматлар” МФЙ Гурлан кўчасида жойлашган кийим-кечак савдо дўконларида ёнғин юзага келгани тўғрисида ФВБга хабар келиб тушган. Шунга кўра 8 та ёнғин-қутқарув экипажи соат 12:59 да ҳодиса жойига етиб бориб, ёнғин соат 13:20 да ўраб олинган ва соат 13:50 да ўчирилган.
Ижтимоий тармоқларда тарқалган видеолардан бирида Damas автомашинаси ёниб кетганини кўриш мумкин.
ФВВ хабарига кўра, ҳодиса оқибатида тан жароҳати олган ва вафот этганлар йўқ. Ҳозирда ёнғин сабаби ва келтирилган моддий зарар миқдори аниқланмоқда.
Эслатиб ўтамиз, аввалроқ Самарқанд вилоятининг Самарқанд туманида савдо дўконларидан бирида катта ёнғин содир бўлганди. Ёнғин оқибатида савдо дўконининг шифт, том қисми ва кийим-кечак маҳсулотлари ёниб зарарланганди.
