Xitoy, Rossiya va Eron qo‘shma harbiy mashg‘ulot o‘tkazadi

Xitoy, Rossiya va Eron mart oyining birinchi yarmida Eronning Chabahar porti yaqinidagi hududda “Security Bond 2025” nomli qo‘shma harbiy-dengiz mashg‘ulotlarini o‘tkazadi. Bu haqda Xitoy Mudofaa vazirligi xabar berdi.

Qayd etilishicha, mashg‘ulotlarning asosiy maqsadi ishtirokchi davlatlar Qurolli kuchlari o‘rtasidagi o‘zaro ishonchni mustahkamlash va amaliy hamkorlikni chuqurlashtirish hisoblanadi. Dastur doirasida dengiz nishonlariga zarba berish, shikastlanishlarni bartaraf etish hamda qo‘shma qidiruv-qutqaruv operatsiyalarini o‘tkazish rejalashtirilgan.

Xitoy tomoni mashg‘ulotlarda “Baotou” esminetsi va “Gaoyu Leyk” ta’minot kemasi bilan ishtirok etadi. “Baotou” esminetsi joriy yilning fevral oyida Pokistonda bo‘lib o‘tgan  “Mir-2025” xalqaro mashg‘ulotlarida ham qatnashgan edi.

Ma’lumot uchun, 2024 yil noyabr oyi oxirida Rossiya Harbiy-havo kuchlari va Xitoy Harbiy-havo kuchlari Yaponiya va Sharqiy Xitoy dengizlari hamda Tinch okeanining g‘arbiy qismida qo‘shma patrullik uchishlarini amalga oshirgandi. 2024 yil sentyabr oyida Rossiya va Xitoy qo‘shma harbiy-dengiz mashg‘ulotlarini o‘tkazdi. 2024 yil oktyabr oyida esa ikki mamlakat harbiylari Tinch okeanida raketa hujumiga qarshi qo‘shma mudofaa mashg‘ulotlarini o‘tkazdi.

Eslatib o‘tamiz, avvalroq Xitoy 2025 yilda harbiy byudjetini 7,2 foizga oshirib, 1,784 trillion yuanga (taxminan 245 milliard dollardan ortiqqa) yetkazmoqchi ekani haqida xabar berilgandi.