Xitoy Berbokka o‘z pozitsiyasini tushuntirib qo‘ydi

Bugun, 14 aprel kuni Xitoy Tashqi ishlar vaziri Sin Gang germaniyalik mavqedoshi Annalena Berbokka Pekinning Tayvan masalasi bo‘yicha pozitsiyasini muntazam ravishda bayon qildi, tomonlar noto‘g‘ri strategik baholashlardan qochishga qaror qildi. Bu haqda Xitoy Tashqi ishlar vazirligi rasmiy vakili Van Venbin ma’lum qildi.

“Bugun ertalab Xitoy-Germaniya strategik diplomatiya va xavfsizlik bo‘yicha 6-muloqot bo‘lib o‘tdi. Tomonlar Xitoy va Germaniya barcha jabhalarda muloqotni olg‘a siljitish, o‘zaro strategik ishonchni mustahkamlash va strategik noto‘g‘ri mulohazalarga yo‘l qo‘ymaslik kerakligi haqidagi konsensusni doimiy ravishda saqlab keldi. Xitoy tomoni Tayvan masalasi bo‘yicha Germaniyaga ham o‘z pozitsiyasini tizimli ravishda taqdim etdi”, deydi Van Venbin. 

Rasmiyning so‘zlariga ko‘ra, Pekin Berlin bilan teng huquqli va o‘zaro manfaatli asosda hamkorlik qilish, pragmatik hamkorlikni oshirish niyatida. U Xitoy va Germaniya bir-birining asosiy manfaatlarini hurmat qilishi zarurligini ta’kidlagan.

Shuningdek, TIV vakili rasmiy Pekin Xitoy-Germaniya munosabatlari va har tomonlama strategik sheriklik munosabatlarining uyg‘un rivojlanishiga ko‘maklashishda davom etish niyatida ekanini ta’kidlagan hamda Berlin bilan xalqaro maydonda barqarorlikni qo‘llab-quvvatlashga harakat qilishini bildirgan.

Ta’kidlash joizki, joriy yilning 12 aprel kuni Germaniya Tashqi ishlar vaziri Xitoyga borishidan oldin Berlin Tayvan bo‘g‘ozidagi status-kvoni o‘zgartirish bo‘yicha bir tomonlama urinishlarni va u yerdagi harbiy kuchayishni qabul qilib bo‘lmasligini aytgan. Germaniya va Xitoy o‘rtasidagi munosabatlarga kelsak, Berbok Yevropa tomoni Xitoyni “sherik, raqobatchi va tizimli raqib” deb bilishini ta’kidlagan. Xitoy tomonining Rossiyaga o‘tkazishi mumkin bo‘lgan ta’sir kuchiga kelsak, vazir bu butun Yevropa va Pekin bilan munosabatlar uchun oqibatlarga olib kelishini bildirgan.

Ma’lumot uchun, Berbokning Xitoyga safari  13-15 aprel kunlariga to‘g‘ri keladi. Xitoy Germaniya tashqi ishlar vazirining Janubi-Sharqiy Osiyo mamlakatlariga olti kunlik safarining birinchi manzili bo‘ldi. 15 aprel kuni vazir Janubiy Koreyaga uchadi va 16 aprelda G7 Tashqi ishlar vazirlarining Yaponiyadagi yig‘ilishida ishtirok etadi.