Xitoy adolatli dunyo tartibi uchun Eron bilan birgalikda kurashishga tayyor – Si Szinpin

Xitoy Eron bilan yanada adolatli dunyo tartibini ta’minlash uchun hamkorlik qilishga tayyor. Bu haqda kecha, 23 oktyabr kuni XXR raisi Si Szinpin Qozonda bo‘lib o‘tgan BRICS sammiti doirasida Eron Prezidenti Mas’ud Pezeshkiyon bilan uchrashuvda ma’lum qildi.

Xitoy rahbari Eronning BRICS’ga a’zo davlatlar rahbarlari yig‘ilishida rasmiy a’zo sifatida ilk bor ishtirok etishini olqishladi.

“XXR global janubning ta’siri va ovozini yanada kuchaytirish hamda xalqaro tartibni yanada adolatli va oqilona yo‘nalishda rivojlantirishga hissa qo‘shish maqsadida BRICS va boshqa ko‘p tomonlama tuzilmalar platformasida Eron bilan hamkorlikni kuchaytirishga tayyor”, dedi Si Szinpin.

U Eronni mintaqa va dunyoda muhim rol o‘ynagan Xitoyning yaxshi do‘sti va hamkori deb atadi.

“Dunyodagi dinamik davr o‘zgarishlari fonida Xitoy-Eron munosabatlarining strategik ahamiyati tobora ko‘zga tashlanmoqda”, dedi Si Szinpin.

U Pekin dunyodagi vaziyatdan qat’i nazar, Tehron bilan do‘stlik va hamkorlikni doimo mustahkamlab borishiga ishontirdi.

“Xitoy Eronni milliy suverenitet, xavfsizlik va milliy qadr-qimmatni himoya qilishda qo‘llab-quvvatlaydi”, deya qo‘shimcha qildi Si Szinpin.

Xitoy rahbari Eronning muvaffaqiyatli ijtimoiy-iqtisodiy rivojlanishidan, qo‘shni davlatlar bilan munosabatlarini yaxshilashdan manfaatdor ekanini bildirdi. U o‘zaro qo‘llab-quvvatlashga va uning asosida ichki siyosatga aralashmaslikning asosiy tamoyilini himoya qilishga, shuningdek, har ikki davlatning qonuniy huquq va manfaatlarini himoya qilishga tayyorligini tasdiqladi.

O‘z navbatida, Pezeshkiyon Xitoy Eronning hamkorlikdagi eng muhim sherigi ekanini aytdi. Uning so‘zlariga ko‘ra, Eron-Xitoy har tomonlama strategik sheriklik munosabatlari va turli sohalardagi ikki tomonlama hamkorlik barqaror rivojlanish dinamikasini saqlab qolmoqda.

Pezeshkiyon ta’kidlaganidek, Eron Xitoy bilan keng qamrovli hamkorlik rejasini amalga oshirish va aloqa, infratuzilma va toza energiya sohalarida ikki tomonlama hamkorlikni chuqurlashtirish, nafaqat Eron milliy taraqqiyotiga, balki mintaqada tinchlik va barqarorlik hissa qo‘shadigan yangi natijalarga erishish uchun birgalikdagi sa’y-harakatlarni intiqlik bilan kutmoqda. Prezidentning ta’kidlashicha, Eron tomonlarning asosiy manfaatlariga oid masalalarda bir-birini kuchli qo‘llab-quvvatlash, gegemonlik va zo‘ravonlikka qarshi turish uchun Xitoy bilan hamkorlikni davom ettirishni kutmoqda.

Pezeshkiyon Xitoyga Eronning BRICS hamkorlik mexanizmiga rasman qo‘shilishini qo‘llab-quvvatlagani uchun minnatdorlik bildirdi va Xitoy bilan BRICS va boshqa ko‘p tomonlama platformalar doirasida yaqin hamkorlik qilishga umid bildirdi.

Tomonlar mintaqaviy masalalar yuzasidan ham fikr almashdi. Si Szinpin Xitoyning Yaqin Sharqdagi mavjud vaziyatdan qattiq xavotirda ekanini ta’kidlab, o‘t ochishni tezda to‘xtatish va G‘azo sektoridagi urushni tugatish mintaqaviy taranglikni bartaraf etishning kaliti ekanligini ta’kidladi.

Xitoy Xalq Respublikasi Raisi ta’kidlaganidek, xalqaro hamjamiyat ishtirok etgan tomonlar BMT Xavfsizlik Kengashining tegishli rezolyutsiyalarini amalda bajarishini ta’minlash va mintaqadagi vaziyatning yanada beqarorlashishiga yo‘l qo‘ymaslik uchun birgalikda harakat qilishi kerak.

Ma’lumot uchun, 22-24 oktyabr kunlari Qozon shahrida Rossiya Federatsiyasining assotsiatsiyaga raisligining muhim voqeasi bo‘lgan BRICS’ga a’zo davlatlar rahbarlarining o‘n oltinchi sammiti bo‘lib o‘tmoqda. Unda 30 dan ortiq davlat vakillari ishtirok etishi kutilmoqda.

Eslatib o‘tamiz, kecha, 23 oktyabr kuni Qozon shahrida BRICS sammiti doirasida turli davlat rahbarlarining uchrashuvlari bo‘lib o‘tgan, uchrashuvlardan so‘ng yetakchilar uchun dasturxon yozilgandi. Kechki ovqat menyusiga an’anaviy tatar taomlari kiritilgan. Xususan, ularga qistibi – kartoshka pyuresi bilan to‘ldirilgan an’anaviy non, osetrina balig‘i va qo‘ziqorinli chuchvara, shuningdek, qo‘zichoqning dimlangan oyog‘i tortilgan.