Kaliforniyadagi yong‘inlarda halok bo‘lganlar soni 24 kishiga yetdi

north_east

Kulga aylangan Los-Anjeles (fotoreportaj)

AQSHning Kaliforniya shtatidagi o‘rmon yong‘inlari oqibatida halok bo‘lganlar soni 24 kishiga yetdi. Bu haqda Los-Anjeles okrugi sud-tibbiy ekspertiza byurosi xabar berdi.

Qayd etilishicha, okrugning shimoli-sharqiy qismida joylashgan Iton hududida 16 kishi halok bo‘lgan bo‘lsa, shaharning g‘arbiy qismidagi Paliseyds tumanida yana sakkiz kishi hayotdan ko‘z yumgan.

CBS News'ga ko‘ra, kelgusi kunlarda shamolning kuchayishi va ob-havo sharoitining murakkablashishi sababli yong‘inlar davom etishi mumkin.

Ma’lumot uchun, Kaliforniyadagi o‘rmon yong‘inlari 7 yanvardan beri davom etmoqda. Ofat Los-Anjeles okrugiga, jumladan Pasifik Paliseyds, Altadena va Malibu hududlariga ta’sir ko‘rsatgan. Keyinchalik yong‘in Iton, Herst va boshqa hududlarga ham tarqalgan.

Jami yong‘inlar 40 ming akr (16 ming gektardan ortiq) maydonni qamrab olgan. CBS News ma’lumotlariga ko‘ra, yong‘inlar sababli 100 mingdan ortiq odam evakuatsiya qilingan.

Kaliforniya gubernatori Gevin Nyusom bu yong‘inlarni zarar ko‘lami jihatidan AQSH tarixidagi eng katta tabiiy ofatlardan biriga aylanishi mumkinligini ta’kidlagan.

Eslatib o‘tamiz, avvalroq AQSHda dron Los-Anjeles hududida o‘rmon yong‘inlari bilan kurashayotgan CL-415 Super Scooper samolyoti bilan to‘qnashib ketgan edi. Hodisa oqibatida samolyotning qanoti shikastlangan, bu esa uni ta’mirlashni kutmasdan, to‘liq ishdan chiqargan. Samolyot yerga qulagan va yonib ketgan.