Qur’onni yoqib yuborgan iroqlik qochqin Shvetsiyadan deportatsiya qilindi
Olam
−
28 Oktabr 2023
15173Shvetsiya migratsiya idoralari iyuldan sentyabrgacha to‘rt marta Qur’onni yoqib yuborgan iroqlik qochqin Salvan Momikaning mamlakatda yashash uchun ruxsatnomasini bekor qilish va deportatsiya qilishga qaror qildi. Bu haqda Shvetsiya migratsiya departamenti vakili Esper Tengrutga tayanib, TV4 telekanali xabar berdi.
Qarorga ko‘ra, Salvan Momika yaqin orada deportatsiya qilinadigan mamlakatni tanlashi kerak bo‘ladi.
“Qaror 25 oktyabr kuni qabul qilingan. Bu bilan uning maqomi (qochoq) va yashash uchun ruxsatnomasi bekor qilinadi va deportatsiya qilinadi”, deydi Esper Tengrut.
Unga ko‘ra, deportatsiya boshpana zarurligi haqida yolg‘on ma’lumot berish bilan bog‘liq. Mamlakatdan deportatsiya qilishdan tashqari, Salvan Momikaning Shvetsiyaga qaytishi besh yilga man etiladi.
Migratsiya idorasi iroqlik qochqinga boshqa davlatdan yashashga ruxsat olishi uchun vaqt bergan, chunki Salvan Momikaning Iroqda "qiynoqqa solinish xavfi" bor. Biroq u Shvetsiyani tark etish niyatida emasligini va migratsiya departamenti qarori ustidan shikoyat qilishini aytgan.
Ma’lumot uchun, Salvan Momika joriy yilning iyun oyidan sentyabrigacha Shvetsiyada Qur’onni yoqish bo‘yicha to‘rtta tadbir o‘tkazgan. Iroq bunga javoban Shvetsiya bilan diplomatik aloqalarni uzib, elchisini Bag‘doddan chiqarib yuborgan. Aprel oyida mamlakat ma’muriy sudi Qur’on yoqib yuborilgan namoyishlarga qo‘yilgan taqiqni bekor qildi.