Qozog‘istonlik tennischi “US Open” finalida Sobolenkoni mag‘lub etdi (video)

Qozog‘istonlik tennischi Yelena Ribakina kecha, 12 sentyabr kuni tunda AQSH Ochiq chempionati – “US Open” finalida dunyoning yaqin kunlargacha birinchi raqamli tennischisi bo‘lib kelgan Arina Sobolenkoni mag‘lub etib, musobaqa g‘olibiga aylandi. 

U hal qiluvchi bahsda 6:4, 5:7, 6:2 hisobida g‘alaba qozonib, faoliyatidagi uchinchi “Katta dubulg‘a” unvonini qo‘lga kiritdi.

27 yoshli Ribakina Nyu-Yorkdagi musobaqa davomida o‘zining chidamliligi va kuchli o‘yinini namoyish qildi. U finalda uchrashuvni servisi omadsiz boshlanganiga qaramay, bazaviy chiziqda Sobolenkoni kuchli zarbalar bilan bosim ostida qoldirdi. Belaruslik tennischi ikkinchi setda hisobni tenglashtirib, hal qiluvchi uchinchi setga chiqishga erishdi, ammo Ribakina bundan ta’sirlanmadi.

Qozog‘istonlik tennischi uchinchi set servisida eng yaxshi o‘yinini namoyish qildi. U dastlabki geymlarda o‘z uzatishlarini ishonchli yakunlab, Sobolenkoga bosimni oshirdi. Belaruslik sportchi esa bu bosimga javob bera olmadi.

Ribakina g‘alabani uchrashuvdagi 12-eysi bilan yakunladi va qo‘llarini baland ko‘tarib, chempionlikni nishonladi.

“So‘nggi bir necha haftada juda ko‘p yutuqlarga erishdim. Hali ham sodir bo‘lgan voqeani qabul qilish qiyin. Barcha mehnatimdan juda xursandman va faxrlanaman. Bu ajoyib”, degan Ribakina.

Ushbu g‘alabadan so‘ng Ribakina dunyodagi eng kuchli qattiq qoplamali kort tennischisi maqomiga ham ega bo‘ldi. U hozirda qattiq qoplamali kortlarda o‘tkaziladigan 3 ta eng yirik musobaqa – Avstraliya Ochiq chempionati, AQSH Ochiq chempionati va “WTA Finals” turnirlarida g‘olib chiqqan.

Ribakina avval 2022 yilda Uimbldon, 2026 yilda esa Avstraliya Ochiq chempionatida chempion bo‘lgan. AQSH Ochiq chempionatidagi g‘alabasi uni uchta “Katta dubulg‘a” turniri g‘olibligiga ega tennischilar qatoriga qo‘shdi. Endi u “Katta dubulg‘a”dagi to‘liq sovrinlarga ega chiqishi uchun faqat Fransiya Ochiq chempionati – Rolan Garosda g‘olib chiqishi kerak.

Arina Sobolenko esa finalga qadar yetib kelishiga qaramay, o‘zining “US Open”dagi uchinchi ketma-ket g‘alabasiga erisha olmadi. U finaldan keyin raketkasini otib yubordi va bir muddat maydon yonidagi o‘yinchilar stulida o‘tirib qoldi.

Sobolenko so‘nggi 8 ta “Katta dubulg‘a” turnirining qattiq qoplamali kortlardagi finalida ishtirok etgan edi. Biroq u bu finallarning barchasida kutilgan natijani qo‘lga kirita olmadi. Uning “Katta dubulg‘a” finallaridagi umumiy natijasi endi 4 ta g‘alaba va 6 ta mag‘lubiyatdan iborat.

Ribakina va Sobolenko o‘rtasidagi bu final ham tarixiy ahamiyatga ega bo‘ldi. Avstraliya Ochiq chempionati 1988 yildan beri qattiq qoplamali kortda o‘tkazila boshlanganidan keyin bir yil ichida bir xil ikki tennischi Avstraliya va AQSH Ochiq chempionatlari finalida to‘qnash kelishi ikkinchi marta kuzatildi.

Bundan tashqari, jahon reytingida birinchi va ikkinchi o‘rinda turgan tennischilarning “Katta dubulg‘a” finalida uchrashib, aynan shu bahsdan keyin reytingda o‘rin almashishi tarixda uchinchi marta sodir bo‘ldi.

Ma’lumot uchun, Ribakina bu yil Sobolenko ustidan “Katta dubulg‘a” finallarida ikkinchi marta g‘alaba qozondi. Shuningdek, u “WTA Finals” turniri finalida ham belaruslik raqibini mag‘lub etgandi.

Sobolenkoning birinchi raqamli tennischi sifatidagi hukmronligi esa 99 hafta davom etdi. Bu WTA reytingi tarixida birinchi o‘rinda uzluksiz qolish bo‘yicha oltinchi eng uzoq natija hisoblanadi.

“Agar u shunday o‘ynashda davom etsa, men muammodaman”, degan Sobolenka mag‘lubiyatdan so‘ng Ribakina haqida hazilomuz tarzda.

Eslatib o‘tamiz, mazkur turnir – “US Open” erkaklar o‘rtasidagi final bahsi esa bugun, 13 sentyabr kuni Toshkent vaqti bilan soat 23:00 da bo‘lib o‘tadi. 2026 yilgi “US Open” chempionligi uchun dunyoning ikkinchi raketkasi, germaniyalik Aleksandr Zverev va amerikalik Ben Shelton (9-o‘rin) o‘zaro bahs olib boradi.