Qozog‘istonda namoyishlarga sabab bo‘lgan gaz korxonasiga jinoiy ish qo‘zg‘atildi

Qozog‘iston huquq-tartibot idoralari yoqilg‘i uchun monopol yuqori narxlarni belgilashda gumonlanayotgan “Suyultirilgan gazni saqlash parki” MCHJga nisbatan jinoiy ish qo‘zg‘atdi. Bu haqda bugun, 9 fevral kuni Respublika Raqobatni himoya qilish va rivojlantirish agentligi matbuot xizmati xabar berdi. 

“Qozog‘iston Raqobatni himoya qilish va rivojlantirish agentligining Atirau viloyati bo‘yicha departamenti “Suyultirilgan neft gazini saqlash parki” MCHJ gaz tarmog‘i tashkilotiga nisbatan ustunlik yoki monopol mavqeini suiiste’mol qilish – monopol yuqori narxlarni belgilash asoslari bo‘yicha tekshiruv boshladi”, deyiladi xabarda. 

Tekshiruv natijalariga ko‘ra, kompaniya Atirau viloyatidagi suyultirilgan neft gazining ikkilamchi ulgurji bozorida ustun mavqega ega ekanligi aniqlangan.

Shu bilan birga, Atirau viloyati Iqtisodiy tergov departamenti ushbu tashkilot faoliyati bo‘yicha tekshiruv o‘tkazgan. 

"Tekshiruv natijalariga ko‘ra, 2019-2021 yillarga mo‘ljallangan monopol yuqori narxlarni belgilashda monopol mavqeini suiiste’mol qilish belgilari aniqlangan. Shu asosda Atirau viloyati iqtisodiy tergov boshqarmasi jinoiy ish qo‘zg‘atgan. “Suyultirilgan gazni saqlash parki” MCHJga qarshi monopoliya daromadlarini davlat byudjetiga undirish bo‘yicha ishlar olib borilmoqda”, deyiladi matbuot xizmati xabarida. 

Eslatib o‘tamiz, joriy yilning 2 yanvar kuni Qozog‘istonda suyultirilgan gaz narxi oshishiga qarshi norozilik namoyishlari boshlandi. Namoyishlar bir necha kundan keyin tartibsizliklarga aylanib ketdi. Ularning ishtirokchilari politsiya va harbiylarga hujum qilgan. Qozog‘iston Prezidenti Qosim-Jomart To‘qayev davlat to‘ntarishiga urinish haqida e’lon qildi. 7 yanvarga kelib vaziyat nisbatan barqarorlashdi, 19 yanvardan butun mamlakat bo‘ylab favqulodda holat bekor qilindi. Rasmiy ma’lumotlarga ko‘ra, ushbu voqealar natijasida 225 kishi halok bo‘lgan, 4 5 mingdan ortiq kishi jarohatlangan.