Қозоғистонда намойишларга сабаб бўлган газ корхонасига жиноий иш қўзғатилди

Қозоғистон ҳуқуқ-тартибот идоралари ёқилғи учун монопол юқори нархларни белгилашда гумонланаётган “Суюлтирилган газни сақлаш парки” МЧЖга нисбатан жиноий иш қўзғатди. Бу ҳақда бугун, 9 февраль куни Республика Рақобатни ҳимоя қилиш ва ривожлантириш агентлиги матбуот хизмати хабар берди. 

“Қозоғистон Рақобатни ҳимоя қилиш ва ривожлантириш агентлигининг Атирау вилояти бўйича департаменти “Суюлтирилган нефт газини сақлаш парки” МЧЖ газ тармоғи ташкилотига нисбатан устунлик ёки монопол мавқеини суиистеъмол қилиш – монопол юқори нархларни белгилаш асослари бўйича текширув бошлади”, дейилади хабарда. 

Текширув натижаларига кўра, компания Атирау вилоятидаги суюлтирилган нефть газининг иккиламчи улгуржи бозорида устун мавқега эга эканлиги аниқланган.

Шу билан бирга, Атирау вилояти Иқтисодий тергов департаменти ушбу ташкилот фаолияти бўйича текширув ўтказган. 

"Текширув натижаларига кўра, 2019-2021 йилларга мўлжалланган монопол юқори нархларни белгилашда монопол мавқеини суиистеъмол қилиш белгилари аниқланган. Шу асосда Атирау вилояти иқтисодий тергов бошқармаси жиноий иш қўзғатган. “Суюлтирилган газни сақлаш парки” МЧЖга қарши монополия даромадларини давлат бюджетига ундириш бўйича ишлар олиб борилмоқда”, дейилади матбуот хизмати хабарида. 

Эслатиб ўтамиз, жорий йилнинг 2 январь куни Қозоғистонда суюлтирилган газ нархи ошишига қарши норозилик намойишлари бошланди. Намойишлар бир неча кундан кейин тартибсизликларга айланиб кетди. Уларнинг иштирокчилари полиция ва ҳарбийларга ҳужум қилган. Қозоғистон Президенти Қосим-Жомарт Тўқаев давлат тўнтаришига уриниш ҳақида эълон қилди. 7 январга келиб вазият нисбатан барқарорлашди, 19 январдан бутун мамлакат бўйлаб фавқулодда ҳолат бекор қилинди. Расмий маълумотларга кўра, ушбу воқеалар натижасида 225 киши ҳалок бўлган, 4 5 мингдан ортиқ киши жароҳатланган.