Qozog‘istonda ilk bor yolg‘on ma’lumot joylagan amaldor jarimaga tortildi

Qozog‘istonda birinchi marta mansabdor shaxs yolg‘on ma’lumot joylagani uchun jarimaga tortildi. Bu haqda “Kazinform” xabar berdi.

Sharqiy Qozog‘iston viloyati prokuraturasiga ko‘ra, u davlat idorasi tomonidan yolg‘on ma’lumot joylagani uchun ma’muriy javobgarlikka tortilgan. Nashrga ko‘ra, u Samara tumani yer munosabatlari bo‘limi boshlig‘i. Prokurorlar tomonidan tuman hokimi veb-saytida mavjud pichanzorlar maydoni 193,4 gektar o‘rniga 180,34, yaylovlar 30 gektar o‘rniga 30,62 gektar deb ko‘rsatilgani aniqlangan.

Xabarda qayd etilishicha, tuman sudi amaldorni iyun oyining oxirida yana javobgarlikka tortgan va 8 avgust kuni qaror qonuniy kuchga kirgan. Boshqarma boshlig‘iga Qozog‘iston Ma’muriy javobgarlik to‘g‘risidagi kodeksining 456-2-moddasi 1-qismi (davlat organi tomonidan yolg‘on ma’lumot tarqatish) bilan ma’muriy huquqbuzarlik to‘g‘risidagi ish qo‘zg‘atilgan va u 117 ming 960 tenge jarimaga tortilgan.

“Respublikada ayni damda mansabdor shaxs internet-resursda yolg‘on ma’lumot joylashtirgani uchun ma’muriy javobgarlikka tortilgan yagona holat”, deyiladi prokuratura xabarida.

Prokuratura bunday faktlar aholini chalg‘itishi va davlat organlariga bo‘lgan ishonchni susaytirishi mumkinligini ta’kidlagan.

Eslatib o‘tamiz, avvalroq O‘sh shahrining markaziy maydonini ta’mirlash-tiklash ishlariga ajratilgan katta miqdordagi mablag‘larni maqsadsiz ishlatish bilan bog‘liq korrupsion sxema fosh etilgandi.