Qozog‘istonda 15 nafar bloger qariyb 2 mlrd so‘m soliq to‘ladi

Qozog‘istonda blogerlar tegishli bildirishnomalar olganidan so‘ng davlatga 75 million tenge (qariyb 2 mlrd so‘m) soliq to‘ladi. Bu haqda Qozog‘iston Milliy iqtisodiyot vaziri o‘rinbosari Serik Jumangarin ma’lum qildi.

Uning ta’kidlashicha, bugungi kunda yirik biznes ko‘pincha soliqlardan bo‘yin tovlash yoki ularni minimal darajaga tushirish uchun turli sxemalardan foydalanadi. Ammo bu borada tartib o‘rnatish ishlari boshlangan va soliq organlari zarur choralarni ko‘rmoqda.

“Ish olib borilmoqda, siz buni ko‘rib turibsiz, ammo men hozircha izoh bermayman. Tegishli bildirishnomalar allaqachon berilgan va bularning barchasi nazorat asosida amalga oshirilgan. Bu soliq qo‘mitasining doimiy ishi. Faqat bu safar biz uning muayyan qismini – ichki tomonini sizga ko‘rsatdik”, dedi Bosh vazir o‘rinbosari.

Uning so‘zlariga ko‘ra, bu soliqchilarni byudjet uchun qo‘shimcha daromad manbalarini izlamayotganlikda ayblayotgan tanqidlar bilan bog‘liq.

“Men shunchaki soliq qo‘mitasi ishlayotganini aytmoqchiman. Bu safar ayrim jihatlar siz uchun oshkor qilindi, jumladan blogerlar bilan bog‘liq masalalar ham. 15 blogerga allaqachon 1,5 milliard tenge miqdorida soliq hisoblandi va 75 million tenge byudjetga to‘landi. Yirik soliq to‘lovchilar va qurilish kompaniyalari masalasiga kelsak, bu soliq qo‘mitasining qanday ishlashiga misollardan biri xolos. Aslida esa bunday holatlar juda ko‘p”, deydi Jumangarin.

Qayd etilishicha, bungacha Davlat daromadlari qo‘mitasi Qozog‘iston blogerlari tomonidan daromadlar kamaytirib ko‘rsatilgan holatlarni aniqlagan – soliq tafovutlari 594 shaxs bo‘yicha 53,3 milliard tenge miqdorida qayd etilgan. Qarzdorlikni qoplash yoki asoslantirilgan tushuntirish taqdim etish uchun ularga 30 kun muhlat berilgan.

Keyinchalik, Davlat daromadlari qo‘mitasi ilgari 93 qozog‘istonlik blogerga yuborilgan 169 ta bildirishnomani qaytarib olganini e’lon qilgan. Bunga texnik xato sabab bo‘lgani aniqlangan.

Joriy yilning 27 fevral holatiga ko‘ra, bildirishnoma olgan 594 blogerdan 12 nafari daromadlar bo‘yicha qo‘shimcha soliq deklaratsiyasini taqdim etgan – umumiy daromad summasi 1,4 milliard tenge, to‘langan soliq esa 74 million tengeni tashkil qilgan.

28 fevral kuni Davlat daromadlari qo‘mitasi Qozog‘istonning qancha blogeri soliq idorasidan bildirishnoma olganini ma’lum qilgan. O‘sha vaqtga kelib, 854 blogerga 71,9 milliard tenge miqdoridagi “daromadlarni kamaytirish” qonunbuzarligi bo‘yicha nazorat bildirishnomalari yuborilgan.