Qoraqalpog‘istonga 150-200 mln dollar xorijiy mablag‘ yo‘naltiriladi

2025-2026 yillarda Qoraqalpog‘iston Respublikasini barqaror ijtimoiy-iqtisodiy rivojlantirishning asosiy maqsadli ko‘rsatkichlari belgilandi. Bu haqda kecha, 14 avgut kuni qabul qilingan “Qoraqalpog‘iston Respublikasini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish to‘g‘risida”gi Prezident qarorida so‘z boradi.

Quyidagilar 2025–2026 yillarda Qoraqalpog‘iston Respublikasini barqaror ijtimoiy-iqtisodiy rivojlantirishning asosiy maqsadli ko‘rsatkichlari etib belgilangan:

• yalpi hududiy mahsulot hajmini o‘rtacha 6–6,5 foizga yetkazish;
• sanoat ishlab chiqarishi hajmini 5–6 foizga yetkazish;
• bozor xizmatlari hajmini 15–17 foizga yetkazish.

Qarorga ko‘ra, Qoraqalpog‘iston Respublikasini 2035 yilgacha rivojlantirish bo‘yicha strategiya 5 yillik batafsil dastur asosida amalga oshiriladi.

Dasturni moliyalashtirish uchun natijaga asoslangan moliyalashtirish tizimi (PforR) bo‘yicha 150–200 million AQSH dollari miqdoridagi xorijiy mablag‘lar jalb qilinadi.