Qorabog‘dagi jangarilar qurol-yarog‘larini topshiryapti – Rossiya 

Tan olinmagan Tog‘li Qorabog‘dagi arman harbiy bo‘linmalari qurol-yarog‘ va texnikalarini topshirishni boshladi. Bu haqda Rossiya Mudofaa vazirligi deb xabar bermoqda.

“Erishilgan kelishuvlarga muvofiq, Qorabog‘ qurolli tuzilmalari Rossiya tinchlikparvar kuchlari nazorati ostida qurol-yarog‘larni topshirishni boshladi”, deyiladi xabarda.

Rossiya Mudofaa vazirligi ma’lumotlariga ko‘ra, 22 sentyabr holatiga ko‘ra, olti birlik zirhli texnika, 800 dan ortiq o‘qotar qurollar va tankka qarshi qurollar, 5 mingga yaqin o‘q-dorilar yetkazib berilgan.

Shuningdek, Rossiya tinchlikparvar kuchlari Qorabog‘da bir kunda ikki marta o‘t ochishni to‘xtatish rejimini buzish holatini aniqlagan, ammo qurbonlar yo‘qligi qayd etilgan.

Bundan tashqari, harbiy idora Rossiya tinchlikparvar kuchlari tomonidan Qorabog‘ning tinch aholisi uchun 10 oy davomida to‘sib qo‘yilgan Lochin yo‘lagi orqali 50 tonnadan ortiq gumanitar yuk yetkazib berilgani haqida xabar berdi.

Eslatib o‘tamiz, joriy yilning 19 sentyabr kuni Ozarbayjon Mudofaa vazirligi Qorabog‘da “Ozarbayjon Respublikasining konstitutsiyaviy tuzumini tiklash maqsadida” mahalliy aksilterror choralari boshlanganini e’lon qilgandi. 20 sentyabr kuni mahalliy vaqt bilan soat 13:00 da mazkur tadbirlar to‘xtatildi.  21 sentyabr kuni Yevlax shahrida Qorabog‘ arman jamiyati vakillari Ozarbayjonning mas’ul vakili bilan uchrashib, muzokara o‘tkazdi.