Qirg‘izistonda koronavirusga chalinganlar soni ortdi

north_east

Qirg‘izistonda bir oylik favqulodda holat e’lon qilindi

Qirg‘izistonda koronavirus bilan bog‘liq yana ikkita holat aniqlandi. Bu haqda Qirg‘iziston Sog‘liqni saqlash vazirligi jamoat salomatligi boshqarmasi boshlig‘i Aynura Akmatova brifingda ma’lum qildi.

Uning ta’kidlashicha, O‘sh viloyatining Novqat tumanida yashovchi ikki kishida koronavirus aniqlangan. Ular 13 mart kuni Umra ziyoratidan kelgan, 60 yoshli erkak va ayol ekanligi ma’lum qilindi.

“Ular yuqumli kasalliklar bo‘limiga yotqizilgan. Hozir ularning ahvoli qoniqarli”, deydi Aynura Akmatova.

Shunday qilib, bugungi kunda Qirg‘izistonda koronavirusga chalinganlar soni 16 nafarga yetdi. 

Eslatib o‘tamiz, joriy yilning 18 mart kuni Qirg‘izistonning Jalolobod viloyatida uch kishida COVID-19 koronavirus infeksiyasi aniqlandi. Kasallanganlarning barchasi Saudiya Arabistonidan qaytgani ma’lum bo‘ldi. Hozirda barcha bemorlar shifokor nazoratida ekanligi aytilmoqda.

Ma’lumot uchun, Jahon sog‘liqni saqlash tashkiloti joriy yilning 11 mart kuni koronavirus kasalligini pandemiya deb e’lon qildi. Hozirgacha ushbu virus dunyoning 193 mamlakatida aniqlangan. Kasallik dunyo bo‘yicha 353 608 nafar odamda qayd qilingan. Ularning 15 417 nafari vafot etgan, 100 616 nafari esa ushbu kasallikdan forig‘ bo‘lgan. Hozirda kasallik yuqtirgan 237 575 nafar odam karantinda yoki shifoxonada davolanmoqda. Ularning 226 277 nafari yoki 95 foizi ahvoli qoniqarli, 11 298 nafari esa og‘ir ahvolda.