Qidiruvda bo‘lgan o‘zbekistonlik Rossiyada qo‘lga olindi

Firibgarlik jinoyatini sodir etgani uchun qidiruvda bo‘lgan O‘zbekiston fuqarosi Rossiyaning Sankt-Peterburg shahrida ushlandi. Bu haqda Buxoro viloyati Ichki ishlar boshqarmasi xabar berdi.

Qayd etilishicha, ushbu shaxs 1982 yilda tug‘ilgan O.E. bo‘lib, Buxoro viloyatining Shofirkon tumani Alisher Navoiy mahallasida ro‘yxatdan o‘tgan. U Jinoyat kodeksining 168-moddasi (Firibgarlik) 4-qismi “a” bandida nazarda tutilgan jinoyatni sodir etib, tergovdan yashiringani uchun Buxoro shahar IIO FMB tomonidan qidiruv e’lon qilingan.

Olib borilgan tezkor-qidiruv tadbiri davomida uning Sankt-Peterburg shahrida yashiringan manzili aniqlanib ushlangan va O‘zbekistonga ekstraditsiya qilinishi ta’minlangan.

Eslatib o‘tamiz, avvalroq Turkiyada huquq-tartibot organlari bilan hamkorlikda to‘rt yildan beri qidiruvda bo‘lgan 26 yoshli O‘zbekiston fuqarosi qo‘lga olingandi. U o‘g‘rilik jinoyatini sodir etganlikda ayblanib, O‘zbekiston Respublikasi ichki ishlar organlari tomonidan 2020 yildan buyon qidiruvda bo‘lgan.