Qashqadaryodagi qishloqqa endi bo‘ri kelib qoldi

Qashqadaryo viloyati Ko‘kdala tumanidagi qishloqlardan biriga bo‘ri kelib qoldi. Bu haqda Tabiat resurslari vazirligi Qashqadaryo viloyati boshqarmasi Matbuot xizmati xabar berdi.

Aniqlanishicha, boshqarmaga “To‘qmor” mahallasida yashovchi fuqaro N.O.ning hovlisiga yovvoyi hayvon kirib qolganligi to‘g‘risidagi murojaat kelib tushgan.

Shundan so‘ng Tabiat resurslari vazirligi Qashqadaryo viloyati boshqarmasi xodimlari hamda Ko‘kdala tuman Ichki ishlar xodimlari bilan o‘rganish ishlari olib borilgan. O‘rganish davomida fuqaroning hovlisiga kirib qolgan hayvon bo‘ri ekanligi aniqlangan.

Holat bo‘yicha viloyatning Shahrisabz shahrida joylashgan “Zootsirk” xususiy korxonasiga xabar berilgan. Mutaxassis tomonidan bo‘rining holati o‘rganilib, uning xulosasi bilan tabiat qo‘yniga qo‘yib yuborish choralari ko‘rilayotgani aytilgan.

Eslatib o‘tamiz,  viloyatning Chiroqchi tumanidagi “Yashnobod” mahallasi hududiga ayiq kelib qolgandi. Biroq yovvoyi hayvon otib o‘ldirilgandi.