Qashqadaryoda Labo va “Gelik” to‘qnashishi oqibatida 2 kishi halok bo‘ldi

Qashqadaryo viloyati G‘uzor tumanida Labo va Mersedes-Benz to‘qnashib ketishi oqibatida 2 kishi vafot etdi. Bu haqda viloyat IIB YHXB matbuot xizmati xabar berdi.

Qayd etilishicha, hodisa joriy yilning 7 oktyabr kuni soat 14:20  larda G‘uzor tumani “Qoratikan” MFY hududidan o‘tuvchi 4R-79 Qarshi-Chim-Chiroqchi-Shahrisabz avtomobil yo‘lining 25-kilometrida sodir bo‘lgan. Haydovchi B.T. boshqaruvida bo‘lgan Mersedes-Benz rusumli avtomobilini Chim-Qarshi yo‘nalishida boshqarib kelayotganda haydovchi Q.S. boshqaruvidagi qarama-qarshi tomondan harakatlanib kelayotgan Labo rusumli avtomobil bilan urilib, yo‘l-transport hodisasi sodir etgan.

Oqibatda Labo rusumli  transport vositasi ichida bo‘lgan 2 nafar fuqaro voqea joyida vafot etgan.

Hozirda mazkur holat yuzasidan O‘zbekiston Respublikasi Jinoyat kodeksining 266-moddasi 3-qismi bilan jinoyat ishi qo‘zg‘atilib, tergov harakatlari olib borilmoqda.

Eslatib o‘tamiz, avvalroq Samarqand viloyati Pastdarg‘om tumanida yuk mashinasi va “Jiguli” to‘qnashishi oqibatida haydovchi halok bo‘lgan edi.