“Qamchiq” dovoni ochildi

"Qamchiq" dovoni yo‘li transport vositalarining harakati uchun ochilmoqda. Bu haqda Favqulodda vaziyatlar vazirligi xabar berdi. 

Ob-havo keskin o‘zgarib kuchli qor yog‘ishi va O‘zbekiston Respublikasi Gidrometeorologiya xizmati markazi tomonidan berilgan 2023 yil 16 fevraldagi 111-son byulleteniga ko‘ra, soat 01:30 da A-373 “M-39 Guliston-Bo‘ka-Angren-Qo‘qon-Andijon orqali-O‘sh” avtomobil yo‘lining 228-253 kilometrlari oralig‘ida qor ko‘chkisi xavfi yuzaga kelganligi sababli "Qamchiq" dovoni yo‘lida transport vositalari harakati vaqtincha to‘xtatilgan edi.
 
Ko‘rilgan tezkor chora-tadbirlardan so‘ng bugun, 16 fevral soat 21:00 dan dovondan harakatlanuvchi barcha turdagi avtotransport vositalari uchun ikki tomonlama harakat to‘liq qayta tiklandi. 

“Barcha haydovchilardan ehtiyotkor bo‘lishlarini, oraliq masofani saqlab, tezlikni me’yoridan oshirmasdan harakatlanishlarini so‘raymiz”, deyiladi FVV xabarida.