“Қамчиқ” довони очилди

"Қамчиқ" довони йўли транспорт воситаларининг ҳаракати учун очилмоқда. Бу ҳақда Фавқулодда вазиятлар вазирлиги хабар берди. 

Об-ҳаво кескин ўзгариб кучли қор ёғиши ва Ўзбекистон Республикаси Гидрометеорология хизмати маркази томонидан берилган 2023 йил 16 февралдаги 111-сон бюллетенига кўра, соат 01:30 да А-373 “М-39 Гулистон-Бўка-Ангрен-Қўқон-Андижон орқали-Ўш” автомобиль йўлининг 228-253 километрлари оралиғида қор кўчкиси хавфи юзага келганлиги сабабли "Қамчиқ" довони йўлида транспорт воситалари ҳаракати вақтинча тўхтатилган эди.
 
Кўрилган тезкор чора-тадбирлардан сўнг бугун, 16 февраль соат 21:00 дан довондан ҳаракатланувчи барча турдаги автотранспорт воситалари учун икки томонлама ҳаракат тўлиқ қайта тикланди. 

“Барча ҳайдовчилардан эҳтиёткор бўлишларини, оралиқ масофани сақлаб, тезликни меъёридан оширмасдан ҳаракатланишларини сўраймиз”, дейилади ФВВ хабарида.