Istanbulda qalbaki alkogol sabab vafot etganlar 30 nafarga yetdi

So‘nggi uch kun ichida Istanbulda qalbaki spirtli ichimliklardan halok bo‘lganlar soni 30 nafarga yetdi. O‘tkazilgan operatsiyalar davomida 8 ta tumanda jami 32 862 litr noqonuniy spirtli ichimlik musodara qilindi va 9 nafar gumonlanuvchi qo‘lga olindi. Bu haqda “Haberler” xabar berdi.

Nashrning yozishicha, qalbaki spirtli ichimliklar tufayli o‘limlar ko‘payishi bilan birga xavfsizlik kuchlari harakatga tushgan. Xususan, Istanbul politsiyasi tomonidan 8 ta tumanda o‘tkazilgan reydlar davomida noqonuniy spirtli ichimlik ishlab chiqaruvchi sexlar va ichki bozorda tarqatishni maqsad qilgan shaxslarning manzillari aniqlanib, zarur chora-tadbirlar amalga oshirilgan. Surishtiruvlar davomida etil va metil spirtidan noqonuniy ichimlik ishlab chiqarayotgan gumonlanuvchilarning shaxsiy ma’lumotlari va yashash joylari aniqlangan. Sultong‘ozi, Fotih, Bakirko‘y, Kyuchyukchekmeje, Chatalja, Esenyurt, Zeytinburnu va Beykoz tumanlaridagi manzillar va transport vositalariga reydlar uyushtirilgan.

Reydlar davomida 9 nafar gumonlanuvchi qo‘lga olingan. Manzillarda o‘tkazilgan tintuvlar davomida jami 32 862 litr noqonuniy metil va etil spirtli suyuqlik, 227 ta soxta ichimlik shishasi va jihozlar musodara qilingan. Operatsiya davomida qo‘lga olingan gumonlanuvchilardan 3 nafari politsiya surishtiruvlaridan so‘ng ozod etilgan. Qolgan 6 nafarining esa tergov ishlari davom etmoqda.

Ma’lumotlarga ko‘ra, jami 83 kishi tibbiyot muassasalariga murojaat qilgan bo‘lib, ularda metanoldan zaharlanish aniqlangan. Hozirgi vaqtda to‘rt kishi shifoxonadan chiqarilgan, 31 kishi reanimatsiyada, 18 bemor esa statsionar davolanmoqda.

Hodisa yuzasidan qo‘lga olingan 6 kishidan ikki nafari Turkmaniston fuqarosi bo‘lib, ularga nisbatan qasddan odam o‘ldirishga urinish moddasi bo‘yicha ayblov qo‘yilgan.

Eslatib o‘tamiz, avvalroq Istanbul shahrida qalbaki alkogoldan zaxarlanib, vafot etgan o‘zbekistonliklar soni 4 nafarga ko‘payib, 10 kishiga yetgani xabar qilingan edi.