Isroilning Suriyaga raketa hujumi oqibatida besh kishi halok bo‘ldi

Isroil harbiy-havo kuchlarining Damashq janubi-g‘arbiy hududlariga raketa hujumi oqibatida kamida besh kishi, jumladan Suriya armiyasining bir a’zosi halok bo‘ldi. Bu haqda Suriya Qurolli kuchlari qo‘mondonligining SANA agentligi tarqatgan bayonotida aytildi.

“Isroil tomoni soat 00:22 da Suriyaga qarshi havo hujumini amalga oshirdi. Damashq shahri va uning atrofidagi ba’zi nuqtalarda ishg‘ol qilingan Golan tepaliklari ustidan havo hududidan raketalar otildi”,  deyiladi bayonotda. 

Qayd etilishicha, buning oqibatida katta moddiy zarar ko‘rilgan, jumladan aholi turar joylaridagi uylar vayron bo‘lgan.

“Besh kishi halok bo‘ldi, ulardan biri askar, yana 15 nafar fuqaro yaralandi. Shifoxonaga yotqizilgan ba’zi odamlarning ahvoli og‘ir”, deyiladi xabarda.

Bayonotda Suriya havo hujumidan mudofaa tizimlari havo nishonlarini o‘qqa tutgani va raketalarning ko‘p qismini urishga muvaffaq bo‘lgani aytilgan.

“Al-Hadath” telekanalining xabar berishicha, Damashq janubi-g‘arbidagi shia jangarilari yotoqxonasi joylashgan binoga Isroil raketasi kelib tushgan.

Unga ko‘ra, zarba Suriya janubidagi Al-Suvayda radiolokatsion stansiyasiga ham berilgan.