Isroil G‘azoga bosqinni to‘xtatmoqchi emasligi ma’lum bo‘ldi

Isroil hech kimning o‘zini himoya qilish huquqini shubha ostiga olishiga yo‘l qo‘ymaydi va huquqiy frontda ham, jang maydonida ham kurashni davom ettiradi. Bu haqda Isroil Tashqi ishlar vaziri Israel Kats Gaagadagi Xalqaro sudda Janubiy Afrikaning G‘azo sektoridagi harakatlari yuzasidan yahudiy davlatiga qarshi da’vosi bo‘yicha tinglovlarni sharhlar ekan aytib o‘tdi. 

“Men Isroil huquqiy jamoamizga Janubiy Afrikaning ikkiyuzlamachiligiga qarshi Gaagadagi Xalqaro [BMT] sudida bizni sharaf va g‘urur bilan himoya qilgani uchun minnatdorlik bildiraman. Vakillarimiz HAMAS qotillari va zo‘ravonlari uchun qonuniy kuch bo‘lgan Janubiy Afrika yuridik guruhiga aytganidek, yolg‘onni ming marta takrorlash buni haqiqatga aylantirmaydi. Hech bir kuch Isroilning o‘zini himoya qilish huquqidan foydalanishiga to‘sqinlik qilmaydi. Garovga olingan 132 kishi yaqinlariga qaytarilguniga qadar biz huquqiy, siyosiy va harbiy jabhada kurashni davom ettiramiz”, degan u o‘zining X sahifasida.

Avvalroq Xalqaro sudda Janubiy Afrikaning Isroilga qarshi da’vosi yuzasidan tinglovlar o‘tkazilgan edi. Janubiy Afrika tomoni vakillari suddan Isroilni genotsid konvensiyasi va ushbu jarayonda ishtirok etayotgan tomonlardan biri sifatida sudning avvalgi qarorlariga muvofiq, G‘azo sektoridagi, jumladan Rafahdagi harbiy amaliyotlarni zudlik bilan to‘xtatish va qurolli kuchlarni butun anklavdan darhol, to‘liq va so‘zsiz olib chiqib ketishni so‘radi. O‘z navbatida Isroil suddan Janubiy Afrikadan kelgan barcha yangi so‘rovlarni rad etishni so‘radi. 

Gaagadagi tinglovlar

Janubiy Afrika 2023 yil 29 dekabrda Gaagadagi Xalqaro sudga Isroilga qarshi ish ochdi. Janubiy Afrika tomoni suddan Isroil hukumatining G‘azo sektoridagi harakatlari genotsid ekanligini tan olishni talab qilmoqda, chunki bu G‘azodagi falastinliklarni kengroq milliy, irqiy va etnik guruhning bir qismi sifatida yo‘q qilish niyatida amalga oshirilmoqda. 

Janubiy Afrika, shuningdek, suddan Falastin aholisini huquqlarining keyingi jiddiy va tuzatib bo‘lmaydigan buzilishidan himoya qilish uchun vaqtinchalik choralar ko‘rishni so‘radi. Hukumat 26 yanvar kuni Isroil G‘azoda genotsidning oldini olish uchun barcha zarur choralarni ko‘rishi kerak degan qarorga keldi.