Isroil Eron bilan urushda sulhni tasdiqladi

Isroil rasmiylari Eron bilan harbiy mojaroda avvalroq AQSH Prezidenti Donald Tramp tomonidan e’lon qilingan o‘t ochishni to‘xtatish kelishuvi kuchga kirganini tasdiqladi. Bu haqda bugun, 24 iyun kuni ertalab Isroil Bosh vaziri Binyamin Netanyaxuning idorasi ma’lum qildi.

Bayonotga ko‘ra, Netanyaxu o‘z Vazirlar Mahkamasiga Isroil o‘zining barcha harbiy maqsadlariga erishganini ma’lum qilgan. Uning so‘zlariga ko‘ra, Isroil Erondan kelayotgan “ikkilamchi ekzistensial tahdid” – yadro dasturi va raketa salohiyatini yo‘q qilgan.

Netanyaxu, shuningdek, Trampga mudofaadagi qo‘llab-quvvatlashi va Eron yadroviy tahdidini yo‘q qilishdagi ishtiroki uchun minnatdorlik bildirgan. Shu bilan birga, Isroil rahbariyati o‘t ochishni to‘xtatish bo‘yicha kelishuvning har qanday buzilishiga “kuch bilan javob berishini” ogohlantirdi.

Bu bayonot Trampning Truth Social mikroblogidagi yangi postidan so‘ng paydo bo‘ldi. U Eron va Isroil o‘rtasidagi o‘t ochishni to‘xtatish kelishuvi kuchga kirganini yozdi.

“Otashkesim allaqachon kuchga kirdi. Iltimos, uni buzmang”, dedi u.

Kechasi Tramp harbiy harakatlarni to‘xtatish bosqichma-bosqich amalga oshirilishini tushuntirdi: Eron Isroilga hujumlarni ertalab soat 6:00 da to‘xtatishi kerak va Isroil ham 12 soatdan keyin xuddi shunday yo‘l tutadi. 24 soatlik muddatdan so‘ng, Trampning so‘zlariga ko‘ra, urush “rasmiy ravishda tugaydi”.

Ayni paytda kechasi Eron Tashqi ishlar vaziri Abbos Aroqchi Trampning Isroil bilan o‘t ochishni to‘xtatish bo‘yicha kelishuvga erishgani haqidagi bayonotini rad etdi. Shu bilan birga, u X ijtimoiy tarmog‘ida 24 iyun kuni ertalab soat 4 ga qadar Eron ham o‘z harbiy amaliyotlarini to‘xtatsa, Isroilga zarba berishni to‘xtatishini yozgan.

“Tehron harbiy amaliyotlarni to‘xtatish bo‘yicha yakuniy qarorni keyinroq qabul qiladi”, deya qo‘shimcha qildi Aroqchi.

Trampning bayonotidan bir necha soat oldin Eron armiyasi AQSHning Qatardagi Al-Udeyd bazasiga hujum qildi. Tramp bu hujumni Qo‘shma Shtatlar tomonidan Erondagi yadroviy inshootlarni yo‘q qilishga qaratilgan “zaif javob” deb atadi.

22 iyunga o‘tar kechasi AQSH Isroil va Eron o‘rtasida 13 iyunda boshlangan harbiy mojaroga kirdi. Amerika armiyasi Eron yadroviy dasturining uchta joyiga zarba berdi, shundan so‘ng Tramp xalqqa murojaatida Eronning uranni boyitish bo‘yicha eng muhim inshootlari yo‘q qilinganini e’lon qildi.