Isroil armiyasi G‘azodagi qochqinlar lagerida kamida 90 falastinlikni o‘ldirdi

Isroilning G‘azo sektori shimolidagi Jabaliya qochqinlar lageriga uyushtirgan so‘nggi hujumlarida kamida 90 kishi halok bo‘ldi, 100 dan ortiq kishi jarohatlandi. Bu haqda “Al Jazeera” xabar berdi. 

“G‘azo Sog‘liqni saqlash vazirligi yakshanba kungi zarbalar turar-joy hududiga berilganini ma’lum qildi. O‘lganlar orasida ayollar va bolalar ham bor, o‘nlab odamlar bedarak yo‘qolgan”, deyiladi xabarda.

Jabrlanganlarning ko‘pchiligi, shu jumladan bolalar, bemorlar bilan to‘lib-toshgan yaqin atrofdagi tibbiyot markazlariga olib ketilgan.

Halok bo‘lganlar orasida Falastin “Islomiy jihod” guruhi vakili Dovud Shehobning o‘g‘li ham bor, deb xabar bergan guruh vakili “Reuters” agentligiga.

G‘azo rasmiylariga ko‘ra, hujum boshlanganidan beri Isroil armiyasi 20 mingdan ortiq falastinlikni o‘ldirgan.

Eslatib o‘tamiz, shu yilning oktyabr oyi oxirida Isroil G‘azo sektoridagi Jabaliya qochqinlar lageriga zarbalar bergandi.