Ilon Mask Ukrainaga qancha xayriya qilganini aytdi

Amerikalik tadbirkor Ilon Mask Ukrainaga 100 million dollar xayriya qilganini ma’lum qildi. Bu haqda u yozuvchi Stiven Kingning Twitter'dagi posti ostida qoldirgan izohida yozdi. 

“Menimcha, janob Mask mening ko‘k chekim (Twitter Blue obunasi uchun to‘lanadigan pul)ni xayriyaga berishi kerak. Men Ukrainada qutqaruv xizmatlarini ko‘rsatadigan Prytula fondini tavsiya qilaman. Bu atigi 8 dollar, shuning uchun janob Mask o‘zidan ham biroz qo‘shishi mumkin” deya post qoldirgan Stiven King.

Ilon Mask esa izohda Ukrainaga 100 million dollar xayriya qilganini bildirib, yozuvchidan “siz qancha xayriya qildingiz?”, deb so‘ragan. Shuningdek, u AQSH Mudofaa vazirligining pulidan voz kechganini ham e’lon qilgan. 

Ukraina Raqamli transformatsiya vaziri Mixail Fyodorov Ilon Maskka minnatdorlik bildirgan va unga qarashli bo‘lgan Starlink faoliyati Ukraina uchun juda muhim ekanini aytgan.

Eslatib o‘tamiz, oldinroq Twitter ma’muriyati Twitter Blue obunasini xarid qilmagan foydalanuvchilar akkauntlaridan verifiyed (tasdiqlanganlik) belgisini olib tashlagan edi.