Gruziyaning Fransiyadagi elchisi “xorijiy agentlar” to‘g‘risidagi qonun tufayli iste’foga chiqdi

Gruziyaning Fransiyadagi elchisi Gocha Javaxishvili “xorijiy agentlar” to‘g‘risidagi qonun loyihasi tufayli iste’fosini e’lon qildi. Bu haqda u Facebook'dagi sahifasida yozdi.

“Shaxsan men atrofimdagi hukumatda ham, diplomatlar orasida ham ochiqdan-ochiq rossiyaparast bo‘ladigan hech kimni bilmayman. Bu ma’lum bir maqsadga erishish uchun o‘ziga xos taktika bo‘lishi mumkin. Ammo men endilikda Yevropaga qarab harakat qilish va o‘zimizni Yevropadan himoya qilishdagi rolim va resurslarimni ko‘rmayapman”, deya yozgan elchi.

Uning so‘zlariga ko‘ra, qonun loyihasi tufayli do‘stlar va xorijiy hamkorlar bilan munosabatlarda yuzaga kelgan vaziyat va kayfiyat Gruziya elchisi sifatidagi missiyasini juda qiyin qiladi.

“Mening fikrim kimgadir foyda yoki zarar keltiradigan siyosiy harakat sifatida qabul qilinishini xohlamayman. Ko‘p ikkilanishlardan so‘ng, menimcha, endi bardoshim yo‘qdek tuyuladigan yukdan qutulmoqchiman”, deya qayd etgan Javaxishvili.

Eslatib o‘tamiz, 1 may kuni Gruziya parlamenti “xorijiy agentlar” to‘g‘risidagi qonun loyihasini ikkinchi o‘qishda ma’qullagandi. Hujjatni 83 deputat qo‘llab-quvvatladi, 23 deputat qarshi chiqdi. Qonun loyihasini yakuniy ma’qullash uchun u uchinchi o‘qishda ham qabul qilinishi kerak.

Hujjat o‘tgan yili qonun loyihasining birinchi varianti muhokama qilinganida ommaviy noroziliklarga sabab bo‘lgan edi. Gruziya Prezidenti Salome Zurabishvili va muxolifat partiyalari qonun loyihasini rossiyaparast deb hisoblab, unga qarshi chiqmoqda. Zurabishvili “xorijiy agentlar” haqidagi qonun loyihasi uch o‘qishda qabul qilinsa, unga veto qo‘yishini aytgan.