G‘azo Marshall rejasiga muhtoj – Falastin Bosh vaziri
Olam
−
04 mart
5249Falastin muvaqqat hukumati Bosh vaziri Muhammad Shtaye G‘arbiy Sohildagi Ramallohda AQSH Kongressi a’zolari, jumladan, senatorlar Kori Buker va Maykl Bennettdan iborat delegatsiya bilan uchrashdi. Bu haqda Falastinning WAFA axborot agentligi xabar berdi.
"G‘azo sektori Isroil agressiyasi tufayli misli ko‘rilmagan gumanitar falokatga duch kelmoqda. Isroil tajovuzi to‘xtatilgach, G‘azoga qayta qurish va iqtisodiyotni tiklashni o‘z ichiga olgan “Marshall rejasi” kerak”, deydi Shtaye senatorlarga.
U yana Qo‘shma Shtatlarni “zudlik bilan o‘t ochishni to‘xtatishni qo‘llab-quvvatlashga, G‘azo sektoriga gumanitar yordam o‘tkazish joylarini ochishga va insonparvarlik inqirozi uchun zarur xizmatlarni ko‘rsatishga ko‘maklashishga” chaqirdi.
Hukumat rahbarining so‘zlariga ko‘ra, BMT Xavfsizlik Kengashida G‘azo sektorida o‘t ochishni to‘xtatishni qo‘llab-quvvatlovchi rezolyutsiya qabul qilinishiga yo‘l qo‘ymaslik uchun AQSH vetosidan bir necha bor foydalanish Isroilni xalqaro niqob ostida ko‘proq qon to‘kishga undaydi. U AQSHni Falastinning BMTga to‘laqonli a’zo bo‘lish so‘roviga veto qo‘ymaslikka va uni ikki tomonlama asosda davlat sifatida tan olishga chaqirdi.
Shuningdek, Muhammad Shtaye Qo‘shma Shtatlardan BMTning Yaqin Sharqdagi Falastinlik qochqinlarga yordam va ishlar agentligi (UNRWA)ni moliyalashtirishni qaytadan boshlashni so‘radi.
"UNRWA yuz minglab falastinliklarga yordam berishga hissa qo‘shmoqda, Isroil esa qotillik, ochlik va vayronagarchilik orqali genotsidning barcha shakllarini amalga oshirmoqda", degan Bosh vazir.
U senatorlarga "Isroil agressiyasi va ko‘chmanchi terrorizmi sodir bo‘layotgan G‘arbiy Sohildagi vaziyat" haqida ham ma’lumot bergan.
LiveBarchasi