G‘azo xarobalari orasida 54 juftlik uchun ommaviy to‘y o‘tkazildi (video)

G‘azo sektorining janubidagi Xon Yunus shahrida joriy yilning 2 dekabr kuni BAAning 54 yillik ittifoq kuni munosabati bilan Abu-Dabi tomonidan qo‘llab-quvvatlangan bayramda 54 juftlik uchun ommaviy to‘y bo‘lib o‘tdi. Bu haqda “Anadolu” xabar berdi.

Hamad turarjoy majmuasining vayronalari ostida o‘tkazilgan marosim BAAning “Jasoratli ritsar 3” gumanitar operatsiyasi doirasida tashkil etilgan.

“Tavb al-Farah” (Xursandchilik libosi), deb nomlangan to‘y sahnasi Isroil genotsididan vayron bo‘lishiga qaramay, chidamlilik va hayotga intilish ramzi sifatida tanlangan.

Marosimda hamma joy Falastin bayroqlari va gullar bilan bezatildi, an’anaviy qo‘shiqlar yangradi, to‘yni ko‘rishga ko‘plab g‘azoliklar yig‘ildi. Tashkilotchilarning so‘zlariga ko‘ra, juftliklar lotereya orqali tanlab olingan, unga anklav bo‘ylab taxminan 2651 arizachi kiritilgan.

“Biz ham butun dunyo kabi baxtli bo‘lishni xohlaymiz, men ham uyim, ishim, hamma kabi bo‘lishni orzu qilardim. Bugun mening orzuyim – yashash uchun chodir bo‘lsa ham topish. Hayot qaytib kela boshladi, lekin bu biz kutganimizdek emas”, deydi uylanayotganlardan biri.

“Jasoratli ritsar 3” kampaniyasi 2023 yilning 5 noyabrida BAA Prezidenti Muhammad bin Zayd Ol Nahayon boshchiligida G‘azoning eng og‘ir jabr ko‘rgan hududlariga oziq-ovqat va tibbiy yordam yetkazib berish uchun boshlangan.