FIFA 2030 va 2034 yilgi Jahon chempionati mezbonlarini e’lon qildi

FIFA futbol bo‘yicha 2030 yilgi Jahon chempionati Ispaniya, Portugaliya va Marokashda o‘tkazilishini e’lon qildi. Shuningdek, 2034 yilgi Jahon chempionati mezbonligi rasman Saudiya Arabistoniga topshirildi.

Qayd etilishicha, 6 yildan so‘ng bo‘ladigan Jahon chempionatiga Ispaniya, Portugaliya va Marokash birgalikda mezbon bo‘ladi. 1930 yilda Urugvayda o‘tkazilgan ilk Jahon chempionatining 100 yilligi munosabati bilan chempionatning dastlabki uch o‘yini Argentina, Paragvay va Urugvayda o‘tkaziladi. Mazkur taklif ham FIFA tomonidan bir ovozdan qabul qilingan.

Saudiya Arabistonining 2034 yilgi chemponat uchun mezbonligi ham bir ovozdan ma’qullangan. Ushbu qaror FIFA prezidenti Janni Infantino boshchiligida o‘tkazilgan onlayn yig‘ilishda 200 dan ortiq a’zo federatsiyalar tomonidan qabul qilingan. Saudiya Arabistonidan boshqa hech qaysi mamlakat mazkur huquq uchun ariza bermagan. Bo‘lajak mezbon Jahon chempionati uchun infratuzilma va boshqa loyihalarni amalga oshirish maqsadida o‘n milliardlab dollar mablag‘ sarflashni rejalashtirmoqda. Bu ishlar mamlakatni modernizatsiya qilishga qaratilgan "Vision 2030" dasturining bir qismi hisoblanadi.