Fayzullayev Fransiya klubiga o‘tadimi?

SSKA klubining o‘zbekistonlik futbolchisi Abbosbek Fayzullayevning Fransiyaning “Monako” klubiga o‘tishi haqiqatdan yiroq. Bu haqda futbolchi “Sport24” saytiga bergan intervyusida aytdi.

“Bu xabar birinchi marta paydo bo‘lganida, Musayev va Diveyev darhol meni masxara qila boshladi va ota-onam barcha qarindoshlar ularni tabriklay boshlashganini aytdi. Shunda men hammani bu holat haqiqatdan yiroq ekaniga ishontirishga shoshildim –barcha yangiliklarni o‘zim ham internetdan bilib oldim. “Monako”ning qiziqishi haqida menda hech qanday ma’lumot yo‘q”, deydi Fayzullayev.

Fayzullayev 2023 yilning avgustidan buyon SSKA safida to‘p surmoqda. Joriy mavsumda u klub safida barcha turnirlar doirasida 23 ta o‘yin o‘tkazib, 3 ta gol urdi va 6 ta golli uzatmaga mualliflik qildi. O‘zbekiston milliy terma jamoasi futbolchisi va Rossiya klubi o‘rtasidagi amaldagi kelishuv 2026 yilning yoziga qadar mo‘ljallangan. “Transfermarkt” internet portalida berilgan ma’lumotlarga ko‘ra, futbolchining bozor qiymati 8 million yevroni tashkil qiladi.

Eslatib o‘tamiz, avvalroq O‘zbekiston terma jamoasining boshqa bir futbolchisi Abduqodir Husanov yana bir mavsum “Lans”da qolishi mumkinligi xabar qilingandi.