Farg‘onada qiz uni olib qochmoqchi bo‘lgan yigitdan qutulib qoldi (video)

Ijtimoiy tarmoqlarda Farg‘ona viloyati Marg‘ilon shahrida bir yigit qizni majburlab qora rangli Lacetti’ga solib, olib ketmoqchi bo‘lgani aks etgan video tarqaldi. Viloyat Ichki ishlar boshqarmasi mazkur holat yuzasidan rasmiy munosabat bildirdi. 

Ma’lum qilinishicha, ushbu holat bo‘yicha Marg‘ilon shahar IIB xodimlari tomonidan olib borilgan surishtiruv ishlari natijasida voqea joriy yilning 11 sentyabr kuni soat 11:07 lar atrofida shahardagi “Tuyagu” MFY hududida sodir etilgani aniqlangan.

Aniqlik kiritilishicha, videoda tasvirlangan qizni olib qochishga uringan yigit Marg‘ilon shahrida 2002 yilda tug‘ilgan fuqaro bo‘lgan. 

“Ko‘chada ketayotganini ko‘rib, gaplashib olish uchun yoniga borgan edim, urishib ketdi. Keyin uni gaplashib olamiz, deb mashinaga chiqarmoqchi bo‘ldim, . Qilgan ishimdan pushaymonman. Masalani to‘g‘rilikcha hal qilishim kerak edi, qaytib bu xatoni qilmayman”, degan yigit. 

Mazkur holat yuzasidan Marg‘ilon shahar IIB tomonidan ma’muriy tartibda hujjatlar rasmiylashtirilib, viloyat IIB nazoratiga olingan.

Eslatib o‘tamiz, avvalroq Toshkent shahri Mirzo Ulug‘bek tumanida noma’lum shaxs pod’ezdga kirib ketayotgan qizga hujum qilgani haqida xabar bergan edik. Aniqlanishicha, mazkur jinoyatni 1994 yilda tug‘ilgan A.Y. sodir etgan. Shahar IIBBga ko‘ra, holatga qonuniy baho beriladi.