Falastinlik bolalarni davolashga O‘zbekistonning imkoniyati yetarli – Elmira Bositxonova 

Kecha, 11 noyabr kuni O‘zbekiston Prezidenti Shavkat Mirziyoyev navbatdan tashqari arab-islom sammitida nutq so‘zlab, urushda jabrlangan falastinlik bolalar va ayollarni O‘zbekiston shifoxonalarida beg‘araz davolashga tayyor ekanini bildirgan edi. QALAMPIR.UZ esa buning uchun mamlakat tibbiyot tizimi qay darajada tayyor ekaniga qiziqdi va Sog‘liqni saqlash vazirining bolalar va ayollar masalalari bo‘yicha o‘rinbosari Elmira Bositxonova bilan bog‘landi. 

Uning ma’lum qilishicha, falastinlik bolalarni davolashga O‘zbekistonning imkoniyati yetarli.

“Prezident bu taklifni aytishidan oldin, avvalo imkoniyat bilan tanishib chiqqan bo‘ladi. Ha, bizda ularni davolash uchun joylar ham, mutaxassislar ham yetarli. Masalan, COVID-19 vaqtida qurilgan maxsus shifoxonalarimiz turibdi. Ammo qancha miqdorda bemor keladi, ular qanday taqsimlanadi, qancha mutaxassis jalb qilinadi, bularning bari maxsus topshiriqdan keyin aniq bo‘ladi. Agar hukumat tomonidan topshiriq tushsa, keyin maxsus yo‘l xaritasi ishlab chiqiladi”, dedi Bositxonova.

Ma’lumot uchun, G‘azodagi Falastin Sog‘liqni saqlash vazirligi bayonotiga ko‘ra, 7 oktyabrdan beri Isroil hujumlari oqibatida 43 603 kishi, asosan ayollar va bolalar halok bo‘lgan. 102 929 nafar falastinlik esa yaralangan. Ularning katta qismini ayollar va bolalar tashkil qiladi.

Eslatib o‘tamiz, Mirziyoyev Falastin xalqiga amaliy yordam ko‘rsatish masalalarini kelgusi yili Samarqandda o‘tadigan “Ko‘rfaz arab davlatlari – Markaziy Osiyo” sammitida ham muhokama qilinishini bildirgandi.