Bozorlarda videokuzatuv kameralari qayerlarga o‘rnatilishi aytildi

Yirik bozorlarda videokuzatuv kameralari qayerlarga o‘rnatilishi ma’lum bo‘ldi. Bu haqda Vazirlar Mahkamasining 27 noyabr kuni “Yirik bozorlarda jamoat tartibini saqlash va yong‘in xavfsizligini ta’minlash tizimini takomillashtirish chora-tadbirlari to‘g‘risida” qarorida so‘z boradi.

Qayd etilishicha, ushbu nizom prezident farmoniga muvofiq respublikadagi yirik bozorlarda tashrif buyuradigan fuqarolar xavfsizligini ta’minlash va jamoat tartibini saqlash maqsadida qabul qilingan.

Yirik bozor deganda 300 va undan ortiq turg‘un savdo shoxobchalari va savdo o‘rinlari mavjud bo‘lgan, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan belgilangan joylarda doimiy yoki vaqtincha asosda faoliyat ko‘rsatadigan mulkiy kompleks va unga tutash hududlar nazarda tutiladi.

Xavfsizlikni ta’minlash texnik vositalari esa ob’ektda jamoat tartibini saqlashni ta’minlash uchun foydalaniladigan qo‘riqlash, tashvish va yong‘in signalizatsiyalari, kirishni nazorat qilish va boshqarish, videokuzatuv, yoritish va xabardor qilish hamda boshqa tizimlar tarkibiga kiruvchi, konstruktiv jihatdan tugallangan, mustaqil funksiyalarni bajaradigan qurilmalardir.

Mazkur nizomda Milliy gvardiya, Ichki ishlar va Favqulodda vaziyatlar vazirliklari xodimlari xizmatini hamda idoraviy qo‘riqlash va yong‘indan saqlash xizmatlari faoliyatini yo‘lga qo‘yish tartibi ham belgilangan. Shuningdek, ushbu xizmatlar xodimlarining huquq va majburiyatlari ham to‘liq tushuntirib o‘tilgan.

Yirik bozorlarda videokuzatuv tizimidagi videokuzatuv kameralari ob’ektning o‘ziga xos xususiyatidan kelib chiqqan holda quyidagi joylarda o‘rnatiladi:

a) ob’ektning avtoturargohiga kirib-chiqish joylarida, avtoturargohning butun hududi va ob’ektning perimetri bo‘ylab, unga tutash hududning eng samarali burchagi (ko‘rinishini) hisobga olingan holda;

b) avtoturargohdan ob’ektga o‘tish yo‘laklarida;

v) ob’ekt hududiga fuqarolar va transport vositalari kirish va o‘tish joylarida;

g) ob’ektning fuqarolar kirishi mumkin bo‘lgan barcha binolariga, inshootlariga va xonalarga kirib-chiqish joylarida;

d) ob’ektning fuqarolar kirishi mumkin bo‘lgan barcha bino va inshootdagi:

• savdo, ko‘rgazma va ovqatlanish joylarida, shu jumladan, bu joylarning “G” va “P” shaklidagi maydonlarida;
•  ko‘p yarusli savdo, ko‘rgazma, ovqatlanish va mijozlar joylashadigan boshqa joylarning har bir yarusida;
• savdo, ko‘rgazma, ovqatlanish va mijozlar joylashadigan boshqa joylarga va bu joylardan xizmat xonalariga o‘tish yo‘laklarida;
•  fuqarolarning shaxsiy buyumlarini, qo‘l yuklarini saqlash joylari oldida;

ye) ob’ektdagi omborxonalarga o‘tish maydonlarida;

ob’ektning qavatlarga o‘tish, chiqib-tushish (zinapoyalar, eskalatorlar) va kirib-chiqish joylarida;

z) ob’ektning debarkatsiyalarida;

i) savdo rastalari orasida.

Videokuzatuv tizimlari ichki ishlar organlari va Milliy gvardiya hududiy bo‘linmalarining situatsion markazlariga hamda ob’ektdagi texnik vositalar operatori xonasiga videosignal uzatilishini ta’minlashi lozim. Videoyozuvlarni saqlash uchun videoaxborot arxivini yaratish 30 kalendar kunni tashkil etib, undan so‘ng yozuvlar avtomatik tarzda yo‘q qilinadi.

Agar videokuzatuv kameralari ziddiyatli vaziyatni qayd etgan bo‘lsa, bunday yozuvlarni saqlash muddati vaziyatga aniqlik kiritilgunga qadar belgilanadi. Jinoiy qilmish yoki ma’muriy huquqbuzarlik qayd etilgan bo‘lsa, bunday yozuvlar jinoyat yoki ma’muriy ishning yuritilishi davomida saqlanadi. Videokuzatuv kameralarining hojatxonalarga va xonalarga o‘rnatilishi taqiqlanadi.

Hujjatda, shuningdek, yirik bozor deya talqin etiladigan bozorlar ro‘yxati hududlar kesimi bo‘yicha taqdim etilgan. Unga ko‘ra, eng ko‘p yirik bozorlar Namangan viloyati hududida (24 ta), eng kami esa Sirdaryo viloyatida (2 ta) qayd etilgan. Hujjatda aytilishicha, Qoraqalpog‘iston Respublikasi Vazirlar Kengashi va hokimliklar IIV, MG va FVV hududiy tuzilmalari vakillari bilan kelishgan holda hududda joylashgan yirik bozorlar ro‘yxatini doimiy yangilab boradi.