Eronda 16 yashar qiz kiyimi tufayli ta’qibga uchragach, joniga qasd qildi

Eronda 16 yoshli Arezo Xavari ro‘mol o‘ramagani va o‘qishdan chetlashtirish tahdidi tufayli maktab rahbariyati bilan kelishmovchilikdan so‘ng o‘z joniga qasd qildi. Bu haqda “IranWire” xabar berdi.

Qayd etilishicha, qiz oltinchi qavatdan o‘zini tashlagan. Qizning otasi maktab rahbariyati va direktor ustidan shikoyat qilgan. Arezo 5 noyabr kuni ekskursiya paytida jinsi shim kiygani uchun direktor o‘rinbosari tomonidan tanqidga uchragan. Mojaroni yumshatish uchun qiz shimini almashtirgan. U dugonalari bilan o‘ynab turgan paytda qisqa muddatga ro‘molini yechgan. Bu esa yana direktor o‘rinbosarining noroziligiga sabab bo‘lgan.

Asli ag‘onistonlik Arezo maktabga kirishda qiyinchiliklarga duch kelgani ham bildirilgan.

“Arezoning sinfdoshlaridan biri shunchaki sharfini olib tashlagani uchun u kuchli stressni boshdan kechirganini aytdi. Eronlik bo‘lmagan shaxs sifatida maktabdan chiqarib yuborish tahdidi uni juda xavotirga solgan. Safar davomida u haddan tashqari stressdan qayta-qayta qusgan”, deyiladi xabarda.

Bolalar huquqlariga bo‘yicha advokat Husayn Raisiy hodisa oqibatida halok bo‘lgan qizning huquqlari toptalganini aytgan.

“Bu oddiy o‘z joniga qasd qilish emas. Bu undash. Bolaga xavf tug‘dirgan, ularning himoyasini e’tiborsiz qoldirgan yoki bunday harakatni rag‘batlantirgan har bir kishi jinoiy javobgarlikka tortiladi”, degan advokat.

Sinfdoshlarining so‘zlariga ko‘ra, Arezoning onasi va akasi uni qidirishni boshlagan, ammo maktab xodimlari, shu jumladan direktor va direktor yordamchisi, uning qayerdaligi haqida hech qanday tashvishga tushmagan. Vaqt o‘tgach oilaga shifoxonadan qo‘ng‘iroq qilingan. Ular Arezoning jonsiz tanasini topishganini ma’lum qilgan. Arezoning do‘stlari maktab rasmiylari ilgari unga yomon munosabatda bo‘lganini ta’kidlashgan. 

“O‘tgan yili unga quvnoqligi, ko‘p kulgani va juda ko‘p do‘stlari borligi uchun tanbeh berishdi. Ular uning hijobini tanqid qilishdi va dastlab uni ro‘yxatdan o‘tkazishga qarshilik qilishdi”, dedi marhumaning do‘stlaridan biri.

Ota holat yuzasida politsiyaga murojaat qilgan.

Eslatib o‘tamiz, 2022 yilning 16 sentyabr kuni Eronda axloq politsiyasi tomonidan noto‘g‘ri hijob kiygani uchun hibsga olingan 22 yoshli talaba Mahsa Amini vafot etgandi. Uning vafotidan so‘ng mamlakatda norozilik namoyishlari boshlandi. Butun mamlakat bo‘ylab misli ko‘rilmagan norozilik to‘lqini kuzatildi. Uch oy ichida miting va yurishlar 157 ta shahar va aholi punktlarini qamrab oldi. Ularning ishtirokchilari demokratik o‘zgarishlarga chaqirib, hukumat tomonidan amalga oshirilayotgan repressiyalarni qoraladi va hibsga olinganlarni ozod qilishni talab qildi. Jami 18,5 mingdan ortiq kishi hibsga olindi. Tartibsizliklarni bostirish vaqtida 507 nafar faol va 66 nafar xavfsizlik xizmati xodimi halok bo‘lgandi.

Muhammad Hodiyev