Erdo‘g‘an Qatar amiriga ham elektromobil sovg‘a qildi

Ayni vaqtda Qatarda bo‘lib turgan Turkiya Prezidenti Rajab Toyib Erdo‘g‘an Qatar Davlati Amiri shayx Tamim bin Hamad Ol Soniyga Turkiyada ishlab chiqarilgan Togg elektromobilini sovg‘a qildi. Bu haqda Prezident Matbuot xizmati xabar berdi.

Erdo‘g‘an Saudiya Arabistoniga tashrifini yakunlab, Qatarga bordi. Prezident Dohada Lusail saroyida rasmiy marosim bilan qutib olingan. 

Marosim ortidan Prezident Erdo‘g‘an va Qatar Amiri o‘rtasida yopiq eshiklar ortida muzokaralar o‘tkazilgan. 

Muzokaralardan so‘ng Turkiya rahbari Qatar amiriga mahalliy Togg elektromobilini sovg‘a qilgan. 

Amir mashinaga o‘tirib, saroy hovlisini aylanib chiqqan. Rahbarlar majlis zaliga mana shu mashinada yetib kelgan.

Eslatib o‘tamiz, 17 iyul kuni Saudiya Arabistoniga borgan Rajab Toyib Erdo‘g‘an Saudiya Arabistoni valiahd shahzodasi Muhammad bin Salmonga ham Togg elektromobilini sovg‘a qilgan edi. Bundan avval ushbu elektromobil O‘zbekiston va Ozarbayjon Prezidentlari Shavkat Mirziyoyev va Ilhom Aliyevga sovg‘a qilingandi.