Endi futbol o‘yinlarida ko‘k kartochkalar ishlatiladi

Futbolda yangi ko‘k kartochka paydo bo‘ladi. Bu haqda “The Telegraph” xabar berdi.

Manbaga ko‘ra, hakam bunday kartochkani futbolchilarga xavfli hujumni to‘xtatib qo‘yadigan taktik qoidabuzarlik hamda uchrashuv rasmiysi bilan keskin tortishgani uchun ko‘rsatadi.

Agar futbolchi ko‘k kartochka olsa, u 10 daqiqaga maydondan chetlatiladi. Agar o‘yinchiga ikkita ko‘k kartochka yoki sariq va ko‘k kartochkalar kombinatsiyasi ko‘rsatilsa, bu o‘z-o‘zidan qizil kartochkaga aylanadi.

Bugun, 9 fevral kuni futbol o‘yini qoidalarini boshqaradigan va tartibga soluvchi Xalqaro futbol assotsiatsiyasi kengashi (IFAB) yangi kartochkaning qachon sinovdan o‘tkazilishi haqida ma’lumot beradi.

Dastlab, ko‘k kartochkani sinovdan o‘tkazish yuqori darajadagi musobaqalarga ta’sir qilmaydi, ammo yozda ingliz klublari turnirlarida, jumladan, erkaklar va ayollar jamoalari o‘rtasidagi Angliya kubogida qo‘llanilishi mumkin.