Endi avtobuslarda kechasi ham yo‘lovchi tashish mumkin bo‘ladi   

Kecha, 21 avgust kuni “Transport vositalarida tashishda harakat xavfsizligini ta’minlashga doir qo‘shimcha chora-tadbirlar to‘g‘risida”gi hukumat qarori qabul qilindi. Bu haqda Adliya vazirligi xabar berdi. 

Qarorga ko‘ra, avtobuslarda haydovchilarning mehnat va dam olish rejimini nazorat qilish qurilmalari bo‘lganda yo‘lovchilarni tunda shaharlararo, viloyatlararo va xalqaro muntazam yo‘nalishlarda ichki ishlar organlari hamrohligisiz tashishga ruxsat beriladi.

2024 yil 1 yanvardan:

•  shaharlararo, viloyatlararo va xalqaro yo‘lovchi tashuvchi avtotransportlar haydovchilarining ish vaqti tabellar, yo‘l varaqlari, chiptani hisobga olish varaqlari taxograf ko‘rsatkichiga asosan hisobga olinadi;

•  mehnat va dam olish rejimiga rioya etilishini nazorat qiluvchi inspektorlar zarur qurilmalar bilan ta’minlanadi.

Qarorda keltirilishicha, muntazam yo‘nalishlarda yo‘lovchi tashish qoidalarini buzganlik, mehnat va dam olish rejimiga rioya etmaslik holatlari yuzasidan Transport nazorati inspeksiyasi xodimlari tomonidan bayonnoma tuzish va ma’muriy javobgarlikni belgilashni nazarda tutuvchi qonun loyihasi ishlab chiqiladi.

Qaror bilan shuningdek, quyidagi tartiblar joriy etiladi:

•  sochiluvchan (qadoqlanmagan) qurilish materiallari, qishloq xo‘jaligi mahsulotlari, sanoat va oziq-ovqat tovarlarini, qurilish va maishiy chiqindilarni, shuningdek, boshqa to‘kiladigan (issiq asfalt, yirik gabaritli va og‘ir yuklardan tashqari) yuklarni N, O3 va O4 toifadagi bortli va o‘zi ag‘daruvchi avtotransportlarda majburiy tartibda brezent yoki polivinilxlorid qoplamali materiallardan tayyorlangan tent bilan bort sathidan oshirmasdan va bortga mustahkam qotirilib, yuza qismi to‘liq yopilgan tarzda tashish;

•  “O‘zbekiston temir yo‘llari” AJning 2023 yil 10 sentyabrdan temir yo‘l transportida mahalliy yuklarni (tosh ko‘mir, qo‘ng‘ir ko‘mir, koks, ma’dan va ma’dan konsentratlari) ichki yo‘nalishlarda ochiq turdagi vagonlarda bortidan oshirib yuklanganda, yukni tashishda brezent yoki polivinilxlorid qoplamali materiallardan tayyorlangan tent bilan qoplangan holda tashish.

Eslatib o‘tamiz, joriy yilning 8 avgustidan boshlab, “Toshshahartransxizmat” AJ tarkibidagi avtobus saroylari tomonidan xizmat ko‘rsatilayotgan 8 ta avtobus “kunlik plan to‘lash” tizimidan ozod qilingan edi. Shuningdek, Prezident Shavkat Mirziyoyevning topshirig‘iga asosan, yo‘lovchilarga qulaylik yaratish hamda avtobus, elektrobuslar salonini sovitish uchun sarflanayotgan yonilg‘i va elektrni iqtisod qilish maqsadida, istisno tariqasida, bepul qoraytirishga ruxsat berilgandi.