Elektr yo‘qligi sababli Toshkentning to‘rtta tumani issiq suvsiz qoldi
Jamiyat
−
25 Oktabr 2023 6411
Elektr ta’minotidagi uzilishlar sababli Toshkent shahrining 4 ta tumani issiq suv ta’minotidan uzilib qoldi. Bu haqda shahar hokimligi xabar berdi.
Ma’lum qilinishicha, bugun, 25 oktyabr kuni Toshkent shahrini issiqlik energiyasi bilan ta’minlaydigan asosiy korxonalardan biri – “Toshkent issiqlik markazi” mas’uliyati cheklangan jamiyatining 4-IM qozonxonasida elektr ta’minoti favqulodda to‘xtatilgani sabab, shaharning Shayxontohur, Olmazor, Yunusobod va Mirzo Ulug‘bek tumanlari issiq suv ta’minotidan uzilib qolgan.
“Shayxontohur, Olmazor, Yunusobod va Mirzo Ulug‘bek tumanlarining 4-IM qozonxonasi faoliyat yurituvchi hududida joylashgan ayrim joylari (jami 892 ta ob’ekt) faoliyati to‘xtatiladi. Issiq suv ta’minoti elektr tarmog‘idagi avariyaviy ishlar tugallanganidan so‘ng tiklanadi”, deyiladi xabarda.
