DXX O‘zbekistonga dron orqali to‘pponcha olib kirganlarni ushladi

Jamiyat 9897
image

Davlat xavfsizlik xizmati Chegara qo‘shinlari harbiy xizmatchilari Qozog‘iston chegarasidan mamlakat hududiga dron yordamida o‘qotar qurolni o‘tkazishga uringan shaxslarni qo‘lga oldi.

DXX o‘tkazgan tadbir davomida kuzatuvga olingan Toshkent shahrida yashovchi ikki nafar fuqaro poytaxt viloyatining Toshkent tumanidan o‘tuvchi o‘zbek-qozoq davlat chegarasi yaqiniga kelib, Qozog‘iston Respublikasi hududidan noqonuniy yo‘l bilan o‘tkazilgan o‘qotar qurolni olgan vaqtlarida ashyoviy dalillar bilan ushlangan.

Ekspertiza xulosasiga ko‘ra, ushbu qurol o‘q otish uchun yaroqli holatdagi “Makarov” nomli to‘pponcha hisoblanib, uning o‘qdonida 6 dona jangovor o‘qlar bo‘lgan.

Tergovga qadar tekshiruv harakatlari davomida aniqlanishicha, ushbu qurol Qozog‘iston Respublikasida yashovchi shaxsdan 4 ming AQSH dollariga sotib olingan bo‘lib, sotuvchi uni uchuvchisiz uchish apparati, ya’ni dron yordamida davlat chegarasidan o‘tkazib bergan.

Ta’kidlash joizki, qo‘lga olingan fuqarolarning biri 2012 yilda Jinoyat Kodeksining 97-moddasi bilan jinoiy javobgarlikka tortilgan bo‘lsa, 2019 yilda 169-moddasi bilan aybli, deb topilib, unga nisbatan 3 yil axloq tuzatish ishlari jazosi tayinlangan. Hozirda mazkur shaxslarga nisbatan qamoq ehtiyot chorasi qo‘llanilib, Jinoyat Kodeksining 246-moddasi bilan jinoyat ishi qo‘zg‘atilgan.

Sunnatilla Abdullayev
Maqolaga baho bering
Baholaganlar: 518
Reyting: 2.9
Teglar
t
×