Davlat tomonidan gaz va “svet” puli to‘lab berilishi uchun arizalar qabul qilina boshlandi

Joriy yilning 1 may kunidan O‘zbekiston bo‘ylab ehtiyojmand oilalarga gaz va elektr energiyasi uchun yil davomida kompensatsiya to‘lash amaliyoti yo‘lga qo‘yildi. Endilikda kompensatsiya faqat qish mavsumi (noyabr–fevral)da emas, har oyda to‘lab beriladi. Bu haqda Ijtimoiy himoya milliy agentligi xabar berdi. 

Ehtiyojmand oilalar uchun 1 iyundan boshlab ariza topshirish boshlangan.

Kompensatsiyalar quyidagi toifalarga mansub oilalarga beriladi:

• Ijtimoiy himoya yagona reyestri va Kambag‘al oilalar reyestiriga kiritilgan oilalar – bunda oila a’zolariga to‘g‘ri keladigan oylik daromad 669 ming so‘mdan kam bo‘lishi lozim;
• Shuningdek, ikki reyestrga ham kirmagan, ammo mol-mulki kam va oylik daromadi har bir a’zoga 1 mln so‘mdan kam bo‘lgan oilalar ham ushbu yordamdan foydalana oladi.

2024-2025 yilgi isitish mavsumi uchun umumiy kam ta’minlangan oilalarga 313.6 mlrd so‘m yordam berilgan bo‘lsa, endilikda bu tizim yanada kengaytirilib, 2025 yilda umumiy hisobda 1 trillion 330 milliard so‘m miqdorida kompensatsiya ajratilishi rejalashtirilgan.

Arizalar “Inson” ijtimoiy xizmatlar markazi, mahalladagi ijtimoiy xodim va 1140 telefon raqami orqali qabul qilinadi.

Eslatib o‘tamiz, avvalroq O‘zbekistonda 2025 yil 1 iyundan e’tiboran qonunchilikda bir qancha o‘zgarishlar amalga oshishi haqida xabar berilgandi.