Butunjahon Universiadasida o‘zbek sportchilari medal jamg‘arish bo‘yicha nechanchi o‘rinda?

Xitoyning Chendu shahri mezbonlik qilayotgan XXXI yozgi Butunjahon Universiadasining navbatdagi kuni ham O‘zbekiston sharafini himoya qilayotgan sportchilar uchun qoniqarli natija bilan yakunlandi. 

Bugun, 4 avgust kuni taekvondo bo‘yicha O‘zbekiston ayollar termasi jamoaviy bahslarda qatnashib, kumush medalni qo‘lga kiritdi. Bu orqali delegatsiyaning umumiy medallari soni 12 taga yetdi.

Hozirda O‘zbekiston hisobida 8 ta kumush hamda 4 ta bronza medal mavjud va bu natija bilan mamlakat delegatsiyasi medallar jamg‘arish bo‘yicha ayni damda 120 ta davlat ichida 28-o‘rinni egallab turibdi.

Ma’lumot uchun, Universiada o‘yinlari 8 avgustga qadar bo‘lib o‘tadi. Bu yilgi Universiadada O‘zbekiston delegatsiyasi taekvondo WT, dzyudo, ushu, gimnastika, tennis, qilichbozlik va yengil atletika sport turlarida 77 nafar atlet bilan qatnashadi.

Eslatib o‘tamiz, kecha, 3 avgust kuni taekvondo WT bo‘yicha O‘zbekiston terma jamoasi yetakchilaridan biri Svetlana Osipova Butunjahon yozgi Univerciada o‘yinlarining bronza medalini qo‘lga kiritgani haqida xabar berilgandi. U murosasiz kechgan yarim final bahsida xitoylik Zetsi Chjouga imkoniyatni boy berib, shohsupaning uchinchi pog‘onasidan joy olgan.

Shuningdek, ushbu  2 avgust kungi bellashuvlarda 3 nafar O‘zbekiston vakili sovrindor bo‘lgani xabar qilingandi. Jumladan, taekvondochilardan Feruza Sodiqova kumush, Najmiddin Qosimxojiyev bronza medaliga ega chiqdi. Shuningdek, ushu bahslarda omadini sinab ko‘rgan Azizbek Isroilov ham shohsupaning 3-pog‘onasidan joy olgan.