Бутунжаҳон Универсиадасида ўзбек спортчилари медаль жамғариш бўйича нечанчи ўринда?

Хитойнинг Ченду шаҳри мезбонлик қилаётган ХХХI ёзги Бутунжаҳон Универсиадасининг навбатдаги куни ҳам Ўзбекистон шарафини ҳимоя қилаётган спортчилар учун қониқарли натижа билан якунланди. 

Бугун, 4 август куни таэквондо бўйича Ўзбекистон аёллар термаси жамоавий баҳсларда қатнашиб, кумуш медални қўлга киритди. Бу орқали делегациянинг умумий медаллари сони 12 тага етди.

Ҳозирда Ўзбекистон ҳисобида 8 та кумуш ҳамда 4 та бронза медаль мавжуд ва бу натижа билан мамлакат делегацияси медаллар жамғариш бўйича айни дамда 120 та давлат ичида 28-ўринни эгаллаб турибди.

Маълумот учун, Универсиада ўйинлари 8 августга қадар бўлиб ўтади. Бу йилги Универсиадада Ўзбекистон делегацияси таэквондо WТ, дзюдо, ушу, гимнастика, теннис, қиличбозлик ва енгил атлетика спорт турларида 77 нафар атлет билан қатнашади.

Эслатиб ўтамиз, кеча, 3 август куни таэквондо WТ бўйича Ўзбекистон терма жамоаси етакчиларидан бири Светлана Осипова Бутунжаҳон ёзги Универcиада ўйинларининг бронза медалини қўлга киритгани ҳақида хабар берилганди. У муросасиз кечган ярим финал баҳсида хитойлик Зетси Чжоуга имкониятни бой бериб, шоҳсупанинг учинчи поғонасидан жой олган.

Шунингдек, ушбу  2 август кунги беллашувларда 3 нафар Ўзбекистон вакили совриндор бўлгани хабар қилинганди. Жумладан, таэквондочилардан Феруза Содиқова кумуш, Нажмиддин Қосимхожиев бронза медалига эга чиқди. Шунингдек, ушу баҳсларда омадини синаб кўрган Азизбек Исроилов ҳам шоҳсупанинг 3-поғонасидан жой олган.