Buxoroda 15 yashar o‘quvchi kanalda cho‘kib ketdi

Buxoro viloyatining Olot tumanida voyaga yetmagan bola o‘z xonadonidan chiqib, cho‘milishga borib, suvga cho‘kib ketdi. Uning jasadi bir kundan keyin topildi. Bu haqda Buxoro viloyati FVB xabar berdi.

Joriy yilning 9 iyun kuni tumandagi 25-umumiy o‘rta ta’lim maktabining 9-sinf o‘quvchisi soat 11:40 larda imtihonni topshirib bo‘lgach, soat 12:00larda uyiga ketgan. Tumandagi “Xalifa” mahallasida yashovchi S.M. soat 14:15 lar atrofida 4 nafar maktabdoshi bilan Qorako‘l tumanidan oqib o‘tuvchi katta “Amu-Buxoro” kanalida cho‘milgan.

Chuqurligi taxminan 4-5 metr, suv hajmi ham juda baland bo‘lgan kanal 15 yoshli S.M.ni oqizib ketgan. Uning yonida bo‘lgan tengdoshlari S.M.ni qutqarishga urinishgan. Biroq harakatlari zoye ketgan. Holatdan qo‘rqib qolgan o‘smirlar voqea joyidan qochib ketishgan.

Bolani qidirish ishlariga FVBning g‘avvos-qutqaruvchilari, baliqchilar jalb etilgandi. Kanal suvi hajmi juda yuqoriligi sababli bolani tirik qutqarib qolish imkoni bo‘lmagan. Qidiruv 10 iyun tongiga qadar davom etgan va shu kuni  bolaning jasadi baliqchilar to‘r xaltasi orqali topilgan.